Tragjedia në Tetovë: 14 viktima, 12 të mbijetuar – detajet e fundit

tetova

Policia maqedonase konfirmon se deri më tani ka arritur në 14 numri i viktimave në Tetovë nga zjarri që ka përfshirë spitalin modular për trajtimin e personave të sëmurë me COVID-19, përcjell albinfo.ch.

Kështu ka bërë të ditur edhe kryetarja e Komunës së Tetovës, Teuta Arifi.

Ajo ka dhënë informacione për zjarrin që ka përfshirë spitalin modular.

Arifi ka thënë se 12 pacientë që kanë mbijetuar nga tragjedia e djeshme janë duke marrë trajtimin në spitalin e Tetovës dhe janë në gjendje stabile. Derisa, ajo ka treguar se ende nuk janë identifikuar të gjitha viktimat.

“Në orët e paradites isha në spitalin e Tetovës për t’u informuar edhe sa u përket viktimave, edhe për gjendjen e të mbijetuarve. Është zyrtare që tani ka 14 viktima, për një numër të vogël të tyre është duke u kryer procesi i identifikimit në institucionin për Mjekësi Ligjore në Shkup, ndërkohë që 12 persona të tjerë që kanë mbijetuar janë vendosur në reparte të tjera në spitalin e Tetovës dhe gjendja e tyre paraqitet stabile”, ka treguar ajo.

Tutje ajo është shprehur se mbrëmë bashkë me krerët e shtetit kanë mbajtur një takim në lidhje me këtë tragjedi dhe se prokuroria po heton rastin, por që ende nuk dihen arsyet e zjarrit.

“Fjala është për një tragjedi të madhe, me pasoja të jashtëzakonshme në njerëz, fatkeqësisht. Në takimin që kishim mbrëmë, meqenëse i tërë kreu i shtetit ishte në Tetovë, si dhe prokuroi republikan, i cili ka për obligim zyrtar që të fillojë procedurën e hetimeve, u informuam që ai proces ka filluar që mbrëmë dhe sot gjatë gjithë ditës, mbledhja e fakteve dhe të dhënave. Deri tani akoma nuk kemi informacione zyrtare për shkaqet që kanë sjellë deri tek kjo situatë, mirëpo kërkesa dhe insistimi ynë është që sa më shpejt të kryejmë të gjitha hetimet me qëllim që të dihet saktësisht cilat janë arsyet e kësaj tragjedie”, ka thënë ajo.

Arifi ka theksuar se deri tani nuk është e informuar se dikush është arrestuar apo ndalur nga policia.

“Deri më tani institucionet nuk kanë informuar për raste arrestimi apo ndalimi, jemi të informuar që ata vazhdojnë proceset e tyre me forenzikën dhe të gjitha aktivitetet që duhet të ndërmerren. Në ndërkohë gjatë ditës së sotme është mbajtur edhe mbledhja e jashtëzakonshme e Qeverisë dhe disa shtete mike kanë ofruar po ashtu ekspertizën e tyre që ky proces të jetë sa më i saktë dhe në të njëjtën kohë sa më i besueshëm. Ajo që unë mund të them se nga shfaqja e COVID-it në Maqedoninë e Veriut janë ndërtuar disa spitale modulare, të cilat janë bërë në bazë të një ligji special, i cili është votuar në Parlament dhe besoj që procesi do t’i hetojë të gjitha aspektet dhe pistat e mundshme që kanë sjellë deri te kjo tragjedi”, ka shtuar ajo.