Lajme

Zv.presidentja e SHBA-së, Kamala Harris, falënderon Kosovën për pranimin e afganëve

E shtunë, 4 Shtator 2021 - 17:30 albinfo.ch

Kamala Harris - Photo Profil facebook

Zëvendëspresidentja e Shteteve të Bashkuara të Amerikës, Kamala Harris, ka thënë se ishte kënaqësi të bisedonte me presidenten e Republikës së Kosovës, Vjosa Osmani, për të falënderuar shtetin e Kosovës për mikpritjen e afganëve në kampin Bondsteel.

Harris në një postim në Twitter shkruan se me presidenten Osmani u pajtuan që të vazhdojnë forcimin e marrëdhënieve të rëndësishme SHBA-Kosovë.

“Ishte kënaqësi të flisja me presidenten e Kosovës, Vjosa Osmani, për të shprehur falënderimin e shtetit tonë për Kosovën për mikpritjen e afganëve në Kampin Bondsteel. Ne u pajtuam të vazhdojmë e të forcojmë marrëdhëniet e rëndësishme SHBA-Kosovë”, shkruan Harris.

Ndryshe, mbrëmë edhe Presidenca e Kosovës ka njoftuar se presidentja Vjosa Osmani ka zhvilluar një bisedë telefonike me zëvendëspresidenten e Shteteve të Bashkuara të Amerikës, Kamala Harris.

Partneriteti i shkëlqyeshëm mes dy vendeve tona dhe raportet e veçanta ndërmjet Kosovës dhe SHBA-së ishin në qendër të kësaj bisede.

Me këtë rast, Osmani i ka shprehur zv.presidentes Harris mirënjohjen e përhershme të popullit të Kosovës për mbështetjen e vazhdueshme nga SHBA-tja dhe ka ritheksuar se SHBA-tja mbetet partneri kryesor strategjik i vendit tonë në procesin e konsolidimit të shtetësisë.

Palët u tha se kanë diskutuar dhe për situatën me pandeminë, me ç’rast Presidentja Osmani i falënderoi dhe njëherë SHBA-në dhe presidentin Biden për donacionin prej mbi 500.000 vaksinash.

Sipas njoftimit të Presidencës së Kosovës, zv.presidentja Harris shprehu po ashtu mirënjohjen e administratës Biden për mbështetjen e Kosovës në këtë mision dhe ritheksoi lidhjen personale dhe të thellë midis Administratës Biden dhe popullit të Kosovës.

Presidentja Osmani e ka ftuar zv.presidenten Harris ta vizitojë Republikën e Kosovës, për t’i parë për nga afër sukseset tona të përbashkëta. Të dy lideret u pajtuan që të takohen personalisht së shpejti.

https://mobile.twitter.com/VP?ref_src=twsrc%5Etfw%7Ctwcamp%5Etweetembed%7Ctwterm%5E1434124090818842629%7Ctwgr%5E%7Ctwcon%5Es1_&ref_url=https%3A%2F%2Ftelegrafi.com%2Fzevendespresidentja-e-shba-se-kamala-harris-falenderon-kosoven-per-pranimin-e-afganeve-te-forcojme-marredheniet-kosove-shba%2F