Belgjikë: Shtatë viktima “të vaksinuara plotësisht” nga COVID-19

Në Belgjikë janë raportuar shtatë fatalitete në një shtëpi të moshuarish nga varianti kolumbian i COVID-19

Ekipi i virologjisë zbuloi nga testet e së premtes së 6 korrikut, se të shtatë viktimat ishin të vaksinuar plotësisht.

Varianti kolumbian i COVID-19, ose B.1.621, është zbuluar javët e fundit në Shtetet e Bashkuara të Amerikës (SHBA), por rastet e raportuara në Evropë ishin të rralla.

Qendra Evropiane për Parandalimin dhe Kontrollin e Sëmundjeve rendit prejardhjen B1.621 si një komponent i variantit Kappa të coronavirus-it, por jo si një variant në vetvete, sipas Reuters, përcjell Albinfo.ch.

Sipas Shëndetit Publik në Angli (PHE), vaksinat kundër COVID-19 janë “më pak efektive” kundër këtij varianti të zbuluar në Kolumbi.

Sipas PHE-së, ky variant kishte treguar shenja të shmangies së përgjigjes imune nga vaksinat ose infeksioni i mëparshëm.

Shtatë personat që vdiqën nga varianti kolumbian në shtëpinë e pleqve në Zaventem, Belgjikë, pranë Brukselit, ishin të gjithë në të 80-at apo 90-at e tyre.

Disa prej tyre ishin tashmë në gjendje të keqe fizike, sipas Marc Van Ranst, një virolog në Universitet të Leuven-it, i cili kreu teste mbi llojin e gjetur në shtëpinë e pleqve.

“Është shqetësuese”, tha Van Ranst, duke iu referuar vdekjeve të banorëve pavarësisht se ishin vaksinuar plotësisht kundër COVID-19.

Shkencëtarët, tani për tani, nuk janë të sigurt nëse varianti kolumbian është më i transmetueshëm se variantet e tjera, tha virologu.

Sipas tij, varianti aktualisht përbën më pak se 1% të rasteve të njohura të COVID-19 në Belgjikë, krahasuar me 2% në Shtetet e Bashkuara.

Sipas Van Ranst, varianti Delta, i cili u zbulua për herë të parë në Indi, është varianti dominues i coronavirus-it në Belgjikë, që përbën afërsisht 95% të infeksioneve, i ndjekur nga Alpha, i cili më parë ishte dominues në Britani.

 

---