Mirsad Kryeziu arrin në Cyrih pas 16 ditësh udhëtimi me biçikletë nga Kosova

Kryeziu është një pjesëtar i policisë kufitare të Kosovës i cili ka ndërmarrë një rrugë të veçantë për të përshkruar rreth 2000 kilometra me biçikletë deri në Zvicër

Ideja për këtë udhëtim me biçikletë nga Kosova deri në Zvicër ishte e kahershme, siç ka treguar për albinfo.ch, Mirsad Kryeziu, diku para 6 vite me parë kishin planifikuar me disa shokë që ta realizonin këtë udhëtim, por që për shkak të problemeve për tu pajisur me viza nuk kishin arritur ta e realizonin këtë udhëtim. Për Mirsad Kryeziun arritja e këtij qëllimi ishte një ëndërr e kahershme, ëndërr për të cilën ai thotë se është tejet i lumtur që ka arritur më në fund ta bëjë realitet.

Kryeziu është një pjesëtar i policisë kufitare të Kosovës i cili ka ndërmarrë një rrugë të veçantë për të përshkruar rreth 2000 kilometra me biçikletë deri në Zvicër. Në një bisedë me albinfo.ch, Kryeziu ka treguar për përvojën e tij 16 ditore të cilën e ka përshkruar si shumë emocionuese dhe tejet të veçantë pasi siç ka treguar Kryeziu, për këto ditë ka parë një solidaritet të paparë të shqiptarëve duke e përkrahur tej mase në rrugëtimin e tij deri në Cyrih të Zvicrës.

Qëllimi i tij nuk ishte vetëm për të arritur deri në destinacionin të cilin i kishte përcaktuar vetes, por edhe për të dëshmuar se edhe si i vetëm mund ta përmbushë ëndrrën e tij, për të cilën kishte pritur prej vitesh. Në bisedën me albinfo.ch ka treguar ndër të tjera se gjatë gjithë rrugëtimit të tij, në mendje e kishte Cyrihun e Zvicrës. Për të Cyrihu ishte cak për të cilin ishte gjatë gjithë rrugës i motivuar për të arritur me çdo kusht.

Ishte 12 Qershori dita kur ai ishte nisur nga Kosova, përmes së cilës ai dëshironte të përçonte mesazhin tek secili i ri që çdo qëllim është i arritshëm, por duhet vetëm vullnet dhe përkushtim për të arritur cakun e dëshiruar.

Mirsad, pavarësisht që është i punësuar, si pjesëtar i policisë së Kosovës, ai tregon se ka gjetur mbështetjen e kolegeve të tij për të marrë këtë rrugë të gjatë dhe të mundimshme.  Përkrahjen ai ka gjetur edhe nga shumë miq e bashkombas, siç ishte rasti i Nysret Kqiku afarist nga Cyrihu i cili ka qenë mbështetësi kryesor i çiklistit Mirsad Kryeziu.

I pasionuar pas çiklizmit, Mirsad Kryeziu në vitin 2017 së bashku me një shok të tijin kishte bërë një udhëtim me biçikleta prej 1 mijë kilometra deri në Stamboll. Kryeziu, është edhe anëtar i klubit të çiklisteve “Rogana” klub me të cilin që për çdo vit në kuadër të “Tour de Kosova”, udhëtojnë deri në 5 ditë me biçikleta.

 

---