Shaqiri: Italia ka ekip fantastik dhe trajner të madh

Xherdan Shaqiri duket se ka tejkaluar problemet me Roberto Mancinin

Xherdan Shaqiri ishte pjesë e Interit në vitin 2015 kur ekipi menaxhohej nga Roberto Mancini. Por, aventura e Shaqirit përfundoi shumë shpejt pas vetëm 6 muajve.

Zvicra dhe Italia do të përballen nesër nga ora 21:00, në kuadër të Kampionatit Evropian, Grupi A, shkruan albinfo.ch.

Shaqiri ka folur për Italinë dhe Mancinin. “Mezi pres të luaj në këtë ndeshje, mezi pres të shoh Roberton sërish. Ai është një njeri i madh, jam i lumtur që gjërat po shkojnë mirë për të. Italia është një ekip fantastik, ndër favoritët. Ne e pamë ndeshjen e parë të Italisë, jam i lumtur për të. Ai është një trajner i madh”, është shprehur mesfushori shqiptar.

Për Italinë ka vetëm lëvdata. “Ekipi kombëtar është shumë i ekuilibruar. Nuk ka lojtarë të mëdhenj të së kaluarës, si Pirlo, por Mancini ka bërë një punë fantastike. Është një ekip i jashtëzakonshëm me futbollist që luajnë mirë së bashku”, theksoi Shaqiri, i cili sa i përket të ardhmes shtoi se ka kontratë me Liverpoolin, por së bashku me agjentin e tij do të marrin vendimin e duhur.

---