Me portofolin e ri digjital, evropianët nuk do mbajnë portofol xhepi

Përmes tij, vetëm duke vendosur ID-në, shenjën e gishtit, ose me njohjen e syrit (si në iPhone) shtetasit europianë do të mund të paguajnë faturat e tyre me vetëm një klik

BE ka zbuluar planet e hollësishme për një portofol digjital, një aplikacion që është duke krijuar. Diçka e tillë lindi si domosdoshmëri sidomos e pandemisë.

Pas kërkesave nga vendet anëtare të Bashkimit Europian, për të aksesuar shërbimet publike dhe private online, u mor vendimi për krijimin e aplikacionit të ri.

Përmes tij, vetëm duke vendosur ID-në, shenjën e gishtit, ose me njohjen e syrit (si në iPhone) shtetasit europianë do të mund të paguajnë faturat e tyre me vetëm një klik. Aty do gjejnë edhe dokumente të tjera zyrtare si për shembull leja e drejtimit.

Përdorimi do të jetë i sigurt.

“ID-ja e re digjitale do t’i japë çdo evropiani çelësat e binjakut të vet digjital”, tha Thierry Breton komisioneri i BE-së i ngarkuar me politikat digjitale, transmeton Koha.mk, përcjell Albinfo.ch.

Aktualisht ka një sistem ekzistues, por që përdoret pak, në vetëm 19 vende dhe më shumë për të nxjerrë certifikata online. Do të duhet një vit punë që sistemi i ri të jetë gati me më shumë opsione.

---