Arrijnë mbi 100 mijë vaksina Pfizer në Kosovë

Kosova mbetet vendi i vetëm në rajon që ka shkallën më të ulët të vaksinimit dhe nuk ka arritur të nënshkruajë asnjë marrëveshje për blerjen e vaksinave anti-Covid. Të gjitha dozat që i ka pranuar deri më tani janë donacion

Kosova ka pranuar sot edhe mbi 100 mijë doza të vaksinës Pfizer si donacion nga Bashkimi Evropian. Lajmin e ka bërë të ditur Ministri e Shëndetësisë, raporton Albinfo.ch.

Njoftimi i plotë:

Sot kanë arritur 100, 620 vaksina Pfizer falë Aleancës Gavi të COVAX. Që nga arritja e 24, 000 dozave të para të vaksinës, të cilat u pasuan nga 38, 400 doza që morëm dy javë më parë, dhe 15, 000 doza, që janë dorëzuar deri më tani nga Mekanizmi i Bashkimit Evropian për Ballkani Perëndimor, ekipet e vaksinimit në të gjithë vendin kanë vaksinuar grupet prioritare dhe qytetarët me sëmundje kronike siç përcaktohet në Planin shtetëror të Vaksinimit.

Vaksinimi është mjeti thelbësor dhe shpresa më e mirë për t’i dhënë fund pandemisë COVID-19.

100, 620 vaksinat e siguruara përmes COVAX janë një hap i rëndësishëm për të ndjekur planin e vaksinimit me ritme të shpejta dhe pandërprerë, sipas të gjithë parametrave të sigurisë dhe cilësisë.

Sidoqoftë, pandemia COVID-19 nuk ka mbaruar ende. Në ndërkohë, ne do të vazhdojmë të mbajmë masat e mëposhtme të parandalimit – mbajtjen e maskave, distancën fizike dhe higjienën e mirë për të kufizuar përhapjen e virusit dhe për të kontribuar në parandalimin e humbjeve të jetës dhe komplikimeve serioze të shëndetit të shkaktuara nga pandemia COVID-19.

---