Mbi 17% e zviceranëve ose 1.5 milion veta janë vaksinuar plotësisht

Deri më tani, 1,504,464 njerëz janë vaksinuar plotësisht, dmth 17,4 për qind e popullsisë tashmë kanë marrë dy doza të vaksinës

Zyra Federale e Shëndetit Publik ka publikuar sot statistikat e vaksinimit për shtatë ditët e fundit. Numri mesatar ditor i vaksinave të injektuara është rritur ndjeshëm në krahasim me javën e kaluar, shkruan SDA.

Nga 17 maji deri më 23 maj, në Zvicër janë dhënë 590,721 doza vaksinash kundër Covid-19, transmeton albinfo.ch. Kjo del nga informacioni që Zyra Federale e Shëndetit Publik (BAG) ka publikuar në faqen e saj të martën.

Mesatarisht 84,389 vaksinash janë kryer në ditë. Krahasuar me javën e kaluar, shkalla e vaksinimit është rritur për 32 për qind.

Gjithsej 4,280,630 vaksina ishin injektuar deri të dielën. Ndërkaq, deri më tani, 1,504,464 njerëz janë vaksinuar plotësisht, dmth 17,4 për qind e popullsisë tashmë kanë marrë dy doza të vaksinës.

Ndërkaq, vetëm vaksinën e parë e kanë marrë 1,271,702 njerëz.

Janë dorëzuar tashmë në kantone por nuk janë përdorur ende, aktualisht 460,520 doza vaksinash, përcjell albinfo.ch. Për më tepër, 89,825 doza vaksinash mbahen të deponuara nga Qeveria Federale.

---