Kurti nuk heq dorë që mërgata të votojë në ambasada e konsullata

Albin Kurti në plan programin 2021-2025 ka bërë të ditur se nuk do të ndalet për ndryshimin e ligjit që mërgimtarët të votojnë në konsullata

Tashmë qeveria e udhëhequr nga Albin Kurti në planprogramin 2021-2025 ka bërë të ditur se nuk do të ndalet për ndryshimin e ligjit që mërgimtarët të votojnë në konsullata, përcjell albinfo.ch.

Qeveria ka theksuar se do t’i japin fund injorimit dhe manipulimit të votës së diasporës.

Po ashtu thuhet se do të krijohen mundësi praktike për lehtësimin e votimit.

“Ne do t’i japim fund dukurisë së deritanishme të injorimit dhe manipulimit të votës së mërgatës. Do të krijohen mundësi praktike për të lehtësuar votimin, duke e mundësuar atë në konsullata dhe ambasada, konform asaj se çfarë nënkuptojmë kur flasim për demokraci, të drejta të barabarta për të gjithë dhe duke u bazuar edhe në praktikat e vendeve të tjera evropiane. Kohët e bllokadës ose keqpërdorimit të mërgatës dhe diasporës nga ana e institucioneve shtetërore do t’i takojnë përfundimisht të kaluarës”, thuhet në programin e publikuar.

Kujtojmë se Kuvendi pati mbajtur seancë për ndryshimin e Ligjit për Zgjedhje, ku i mundësohet mërgatës të votojë nga ambasadat dhe konsullatat, por ky ligj nuk kaloi në shqyrtim.

---