Kurz nderohet me “Çmimin e Lirisë së Medias” në Gjermani

Kancelari i Austrisë, Sebastian Kurz ka fituar "Çmimin e Lirisë së Medias" në Gjermani. Sipas jurisë, këtë çmim, Kurz e merr përshkak se ka qenë një urëlidhës në Evropë dhe një komunikues i lirisë.

Mediat gjermane kanë njoftuar se kancelari austriak, Sebastian Kurz, është nderuar në Gjermani me “Çmimin e Lirisë së Medias”, raporton albinfo.at. “Kancelari Sebastian Kurz ka treguar veten për të satën herë në karrierën e tij politike që është bashkëpunëtor dhe një urëlidhës i shteteve në Evropë”, kanë deklaruar nga juria.

Ky çmim jepet për të shtatën herë dhe gjithmonë ndahet për figura të njohura publike, të cilët kanë shfaqur një përkushtim të veçantë për lirinë e shprehjes, ndërveprimin shoqëror, dialogun politik dhe forcimin e demokracisë.

Kurz këtë çmim do ta pranojë më 11 maj në Samitin e Ludwig Erhard, i cili organizohet nga Weimer Media Group(WMG). Për shkak të krizës së koronës, manifestimi do të zhvillohet në formatin stream në Bavaria Film Studios në Munih.

 

---