Gjermani: Të vaksinuarit do të kenë më shumë liri qarkullimi

(AP Photo/Michael Probst)

Ministri gjerman i Shëndetësisë, Jens Spahn, premton lirime për ata që janë plotësisht të vaksinuar, përcjell albinfo.ch.

Sipas ministrit gjerman të Shëndetësisë, Jens Spahn, (CDU) kush është i vaksinuar ndaj virusit Corona, së shpejti do të ketë më shumë liri. „Kush është plotësisht i vaksinuar, mund të trajtohet në të ardhmen, si dikush që është testuar negativisht”, u shpreh Spahn në fundjavë për gazetën gjermane të së dielës „Bild am Sonntag”. Në sfond qëndron një analizë e Institutit Shkencor Robert Koch, RKI, sipas së cilës detyrimi për karantinim dhe testim për ata që janë plotësisht të vaksinuar do të duhet të hiqet së shpejti”, shkruan kjo gazetë.

Sipas kësaj, kur të ketë rënë vala e tretë e pandemisë dhe të fillojnë hapje të tjera bazuar në testet e shpejtë, do të mund të zbatohet ky vendim. „Kush është i vaksinuar, mund të hyjë pa test të shpejtë në dyqan apo në parukeri”, tha Spahn. Përveç kësaj në bazë të vlerësimit të RKI nuk do të ketë më karantinë për ata që janë plotësisht të vaksinuar.

Thuhet se bazë për këto plane janë evaluimet e studimeve shkencore aktuale nga RKI. Gazeta „Bild am Sonntag” i referohet një raporti të dërguar në Ministrisë e Shëndetësisë, të cilin thuhet se „sipas dijeve aktuale rreziku i një transmentimi të virusit përmes personave që janë vaksinuar plotësisht më së voni nga dita e 15-të e dhënies së dozës së dytë të vaksinës është më i ulët se sa prova e një testi negativ të shpejtë tek personat e infektuar pa simptoma”.

Ky raport është dërguar të shtunën te landet. Konferenca e Kryeministrave të Landeve i ishte drejtuar me një lutje RKI për të analizuar, kur dhe nëse “mund të jetë e panevojshme” përfshirja e të vaksinuarve në konceptet testuese. Ministri gjerman i Shëndetësisë, Jens Spahn, kërkon të zbatojë shpejt lirimin e të vaksinuarve nga detyrimi i testimit dhe karantimit. “Ne do t’i zbatojmë pa vonesë në praktikë këto të dhëna në bisedime me landet”, tha Spahn. (DW)