“Çështja Halili” ndan në dysh Parlamentin e Kantonit Baselland

Në fund mbizotëruan ato forca që nuk donin t`ia linin ekzekutivit mundësinë e vendimit për natyralizim. Kështu, "Çështja Halili" doli kundërproduktive për ata që ishin në favor të ndryshimit

Këshilli bashkiak i komunës Oberdorf (BL) dëshiron të vendosë vetë për natyralizimet në të ardhmen dhe jo që këtë ta bëjë ekzekutivi.

Banorët do të vendosin javën tjetër për rregulloren e re, e cila është iniciuar veç tjerash edhe nën ndikimin e “çështjes Halili” në komunën e afërt, Bubendorf, shkruan bzbasel.ch. Komunat e tjera mund të ndjekin këtë shembull.

Siç është shkruar tashmë shumë herë gjatë viteve të fundit, familjes shqiptare Halili nga Kosova ka disa vite që i mohohej pasaporta zvicerane. Pas shumë peripecishë, bashkëshortja dhe fëmijët e Hamdi Halilit e kanë marrë këtë pasaportë ndërsa vetë kryefamiljari po përballet ende me refuzimin. Tashmë dy herë me radhë natyralizimin e tij e ka kundërshtuar Asambleja e qytetarëve e komunës Bubikon.

Këshilli i vendit ose asamblea qytetare është një institucion i demokracisë së drejtpërdrejtë zvicerane, ku marrin pjesë të gjithë qytetarët e komunës përkatëse me të drejtë vote, shkruan albinfo.ch

Në nivelin kantonal, çështja “Halili” ka dështuar për fare pak. Me 44 Kundër dhe 41 vota Pro, parlamenti i Kantonit Baselland ka  fundosur para tri javësh një kërkesë parlamentare të bërë nga  administratori i komunës së Bubendorfit,  Thomas Noack (PS), transmeton albinfo.ch. Ai donte që vendimi për aplikimet e natyralizimit të vihej në kompetencën e organeve ekzekutive të zgjedhura siç është këshilli i qytetarëve ose këshilli bashkiak.

Kjo kërkohej pasi kosovarit Hamdi Halili i është refuzuar dy herë radhazi pasaporta e kuqe nga këshilli i vendit, i komunës Bubendorf.

Sidoqoftë, vetëm “çështja Halili” nuk ishte e mjaftueshme: natyralizimet mbeten edhe më tutje punë për asamblenë e qytetarëve në këtë kanton.

Ishte afër, por në fund mbizotëruan ato forca që nuk donin t`ia linin ekzekutivit mundësinë e vendimit për natyralizim, përcjell albinfo.ch. Kështu, “Çështja Halili” doli kundërproduktive për ata që ishin në favor të ndryshimit.

Ashtu si dhe më parë, në shumicën dërmuese të komunave të këtij kantoni, natyralizimi i të huajve mbetet çështje e legjislativit posaçërisht asambleve të qytetarëve.

---