Takimi virtual i konsullatës së Kosovës në Stuttgart me ministren e shtetit Baden

Konsullata e Përgjithshme e Republikës së Kosovës në Stuttgart për nder të 13-vjetorit të shpalljes së Pavarësisë së Republikës së Kosovës organizoi një takim virtual me Ministren e Shtetit Baden- Württemberg znj. Theresa Schopper dhe Nënkryetarin e Parlamentit Evropian, z. Rainer Wieland, me diasporën kosovare në Baden- Württemberg, shkruan Albinfo.ch.

Në bashkëbisedim ministrja Schopper foli për bashkëpunimin ndërshtetëror dhe uroj 13-vjetorin e Pavarësisë, si dhe siguroi vazhdimin e përkrahjes si në fushën e arsimit profesional, që është duke e mbështetur aktualisht, ashtu edhe në arsimin e lartë. Gjithashtu foli për rëndësinë e diasporës sonë në Baden- Württemberg dhe integrimin e mirëfilltë të saj në shoqërinë gjermane.

Nënkryetari i Parlamentit Evropian foli për rrugën e Kosovës drejt BE-së dhe rëndësinë për liberalizim të vizave dhe angazhimin e diasporës sonë në shoqërinë gjermane.

Nga të pranishmit u parashtruan çështje të ndryshme, si nga studentët, çështja e bursave, tarifes semestrale, mundësia e praktikave nëpër institucione për studentët kosovarë etj. Gjithashtu nga përfaqësuesit e shoqatave u ngrit çështja e anganzhimit të diasporës në jetën shoqërore dhe atë politike.
Nga afaristët u kërkua njohja e patentë shoferëve kosovarë, pasi kjo po paraqet vështirësi për punëdhënësit dhe punëmarrësit.
Zonja Schopper dhe zotëri Wieland premtuan angazhimin e tyre në avancimin e temave të ngritura dhe falënderuan Konsujt Imer Lladrovci dhe Besnik Miftaraj për krijimin e platformave bashkëbiseduese me diasporën tonë.

Drejtuesi i Konsullatës së Përgjithshme, z. Lladrovci, falënderoi miqtë gjermanë për përkrahjen e vazhdueshme dhe bashkëpunimin e shkëlqyer me Konsullatën e Kosovës në Stuttgart, njëhëresh vlerësoi lart angazhimin e diasporës sonë dhe kontributin e saj për Kosovën.

Konsulli Miftaraj foli për bashkëpunimin në fushën e arsimit profesional, projekt që mbështetet dhe financohet nga Ministrja e shtetit dhe që zhvillohet që 4 vjet, gjithashtu edhe për shkëmbimin e nxënësve, projekt që mbështetet nga nënkryetari i Parlamentit Evropian.

Pjesëtarët e Diasporës falënderuan organizatorët për platformën dhe mundësinë e krijuar për këtë bashkëpunim.