Ky është numri i personave që kanë hyrë në Kosovë përmes kufijve tokësor brenda 24 orëve

Numër i madh i bashkatdhetarëve kanë ardhur në Kosovë ditëve të fundit. Arsyeja kryesore duket të ketë qenë votimi në vendlindje për Zgjedhjet parlamentare të Republikës së Kosovës, të cilat do të mbahen të dielën e 14 shkurtit.

Kjo ardhje e bashkatdhetarëve është parë e dokumentuar prej fotografive të publikuara në rrjete sociale si nga individ ashtu edhe nga grupe të partive politike, por është kuptuar edhe nga numri i madh i fluturimeve që kanë ateruar në Aeroportin e Prishtinës.

Megjithatë, përveç fluturimeve me aeroplan, shumë të tjerë ja kanë mësyrë Kosovës me autobusë apo vetura personale.
Sipas raportit ditor të Policisë së Kosovës për hyrjet dhe daljet në pikat kufitare, gjatë 24 orëve të fundit në territorin e Republikës së Kosovës kanë hyrë 172 autobusë dhe 6723 vetura. Ndërsa janë 16 800 persona që kanë hyrë brenda vendit dhe 14932 që kanë dalë nga territori i Republikës së Kosovës, kështu deklaroi Policia e Kosovës për albinfo.ch.

Ndryshe, sipas vendimit të Qeverisë së Kosovës “Të gjithë qytetarët e Kosovës (përfshirë edhe ata me vendbanim në një shtet tjetër), gjatë hyrjes në Kosovë duhet të paraqesin vërtetim për test RT-PCR negativ të bërë më së largu 72 orë para hyrjes në Kosovë, në të kundërtën duhet të vetë-izolohen për 7 ditë.”

Ky vendim vlen njëjtë sikur për ata që hyjnë në Republikën e Kosovës nga Aeroporti i Prishtinës po ashtu edhe për qytetarët që vijnë përmes kufijve tokësor.