Ilaçi që zvogëlon rrezikun e vdekjes nga Covid

Keystone (University of Oxford/John Cairns via AP)

Një ilaç antimalcues, tocilizumab, zvogëlon rrezikun e vdekjes te pacientët e shtruar në spital me gjendje të rëndë të COVID-19, sipas rezultateve të një studimi të gjerë, i vlerësuar si “lajm i mirë” nga specialistët, shkruan AFP, përcjell Albinfo.ch.

“Rezultatet nënkuptojnë se për 25 pacientë të trajtuar me tocilizumab, një jetë shtesë do të shpëtohet”, thanë autorët e këtij studimi klinik në Britaninë e Madhe, “Recovery”, që po teston një sërë ilaçesh.

Studimi tregoi, gjithashtu, se tocilizumab shkurton kohën e daljes së pacientëve nga spitali dhe zvogëlon nevojën për frymëmarrje artificiale.

“Ky është një lajm i shkëlqyer”, tha Anthony Gordon, profesor i anestezisë dhe kujdesit intensiv në “Imperial College”, Londër.

“Rreth 4 000 pacientë të sëmurë rëndë janë trajtuar me tocilizumab në BM. Sot, edhe më shumë pacientë do të përfitojnë nga ky trajtim”, shtoi ai.

Sipas studiuesve, përfitimet nga tocilizumabi tani u shtohen atyre të steroideve.

Të dhënat sugjerojnë se në pacientët COVID-19 me hipoksi (që kërkon oksigjen) dhe inflamacion të rëndësishëm, trajtimi me një kortikosteroid, të tillë si deksametazoni dhe tocilizumab zvogëlon vdekshmërinë me rreth një të tretën në pacientët që kërkojnë oksigjen të thjeshtë dhe gati me gjysmën për ata që kërkojnë ventilim invaziv mekanik (respirator).