Votuesit nga Gjermania dhe Zvicra, me numrin më të madh në këto zgjedhje

Votuesit nga diaspora kanë shënuar rritje përgjatë viteve, me theks të veçantë nga viti 2010, kur edhe janë mbajtur zgjedhjet e para të Kosovës si shtet.

Në këto zgjedhje 102,100 qytetarë që janë regjistruar dhe verifikuar në KQZ për të votuar nga diaspora, për dallim nga zgjedhjet e vitit 2019, kur ishin 35,087 të regjistruar, transmeton albinfo.ch.

Pesë vendet e para, prej nga kanë arritur më shumë aplikime janë: Gjermania, Zvicra, Austria, Franca e Suedia.

Referuar të dhënave nga KQZ-ja, në listën e aplikacioneve të aprovuara, prin Gjermania me 43 mijë e 49 aplikacione, pastaj diaspora nga Zvicra, me 26 mijë e 686, Austria me 4 mijë e 758, Franca me 4 mijë e 164 dhe Suedia 4 mijë e 69, transmeton tutje albinfo.ch.

Përveç shteteve të lartpërmendura, janë edhe me mijëra aplikacione të aprovuara që vijnë nga Mbretëria e Bashkuar, Finlanda, SHBA-ja, Belgjika, Kroacia, Sllovenia e shumë të tjera vende të largëta si: Japoni, Meksikë, Lituani, Panama, Somali, Kosta Rikë etj.

Nga ana tjetër, referuar të dhënava nga KQZ, nga procesi i kaluar zgjedhor, 2019, më së shumti aplikacione të aprovuara janë shënuar nga votuesit e Gjermanisë, me 11.449 vota, vendi i dytë sa u përket votuesve ishte Zvicra me 9.842 vota, nga Serbia ishin 4.337, nga Austria ishin 1.387 vota, Italia 1.137, Franca 1.091, Shtetet e Bashkuara 1020 dhe Suedia me 1007 vota, transmeton albinfo.ch.

Kujtojmë se në vitin 2019 numri i fletëvotimeve të dërguara përmes postës ishte dyfish më i ulët se ai i aplikacioneve të dërguara. Nga 40 mijë e 313 aplikacione në total, vetëm 20 mijë e 200 fletëvotime u dërguan përmes postës. /Albinfo.ch