Rënie e theksuar e “Vlerës R” të Covid-19 në Zvicër

Nëse numri i riprodhimit (vlera R) është mbi 1, numri i infeksioneve të reja çdo ditë rritet

Numri i riprodhimit ose i njohur më mirë si “Vlera R”, që tregon se sa njerëz janë të infektuar me koronavirus mesatarisht, në Zvicër dhe Lihtenshtajn ka rënë së fundi në  0.82.

Zyra Federale e Shëndetit Publik (BAG) ka raportuar për këtë në faqen e saj të internetit sot, shkruan srf.ch.

Duke qenë se raportimet vonohen për shkaqe verifikimi, numri i prezantuar të dielën i referohet 7 janarit, transmeton albinfo.ch. Ndërsa të shtunën është raportuar një vlerë prej 0.83 për 6 janarin e këtij viti.

Vetëm pak ditë më parë kjo vlerë ishte rritur në 1.04 në nivel të vendit.

Nëse numri i riprodhimit (vlera R) është mbi 1, numri i infeksioneve të reja çdo ditë rritet.

BAG ka raportuar vlerën R prej më shumë se 1 të dielën për kantonet si: Obwalden, Schaffhausen dhe Gjenevë, përcjell albinfo.ch. Ndërsa vlera ishte nën 0.8 në kantonet: Ticino, Cyrih, St. Gallen, Thurgau dhe Lihtenshtajn.

 

---