Edhe Italia bëhet gati për shpërndarjen e vaksinës

Keystone (University of Oxford/John Cairns via AP)

“Italia do të ketë një pikë “ruajtje dhe administrimi” vaksinash anti-covid për çdo 20 mijë banorë”.

Kjo është bërë e ditur nga komisari për emergjencën Domenico Arcuri ndërsa ka dhënë detaje për planin që po përgatit Italia për shpërndarjen e vaksinës. Ky plan duhet të jetë gati për javët e ardhshme.

Plani që Italia po përgatit merr në konsideratë 4 çështje: shpërndarje nga kompania prodhuese e vaksinës ose shteti blerës, temperaturën e ruajtjes së vaksinës, modalitetin e shpërndarjes si dhe intervalin kohor mes dozës së parë dhe të dytë, transmeton Scan, përcjell albinfo.ch.

“Duke konsideruar këto 4 variabla, po organizojmë një plan që parashikon përfshirjen e Rajoneve dhe Komunave të cilave u kam kërkuar që të më tregojnë pikat e administrimit në brendësi të spitaleve”, është shprehur Arcuri.

Deri më tani, Italia ka shpenzuar 94 milionë euro, që është edhe kuota që Bashkimi Evropian i ka kërkuar Italisë për të blerë për sasinë e vaksinave që janë deri më tani të gatshme.