Huqja e laboratorit të Devollëve, ja rasti konkret

I thanë se është pozitiv me COVID, del negativ një ditë më pas në Austri

Pavarësisht se qytetarët paguajnë shuma të mëdha parash dhe iu duhet të presin në radhë për t’u testuar për COVID-19 në laboratorin “Medical Laboratory Services”, ata në fund nuk marrin analiza të sakta.

Laboratori i cili është në pronësi të vajzës së Blerim Devollit, duket se ka probleme serioze me saktësinë e kryerjes së testit PCR për detektimin e COVID-19.

Kështu të paktën del në një rast, të dhënat e të cilit i ka siguruar Gazeta Express, përcjell Albinfo.ch.

Një personi, të cilit i ishte marrë mostra më 26, më datën 27 gusht 2020 kishte rezultuar pozitiv me  COVID-19 sipas rezultateve të laboratorit ‘Medical Laboratory Services’.

“Ne mostrën e pranuar ka prezencë të sekuencave specifike të Corona Cov-2 (JANE DETEKTUAR)”, thuhet në dokumentacionin e lëshuar nga laboratori MLS.

Por, një ditë më pas, më 28 gusht 2020,  pasi kishte udhëtuar drejt Austrisë, në analizat e kryera nga institucionet shëndetësore austriake ka rezultuar negativ.

“Negativ, nuk është detektuar SARS COV 2”, është përfundimi i analizës në laboratorin austriak.

“Medical Laboartory Services” aktualisht ka monopol në kryerjen e analizave PCR për COVID-19, duke qenë se shteti i ka hequr licencën që i kishte thënë para pak kohësh UBT-së.

Për kryerjen e një testi Rapid PCR në laboratorin MLS duhet paguar 200 euro.

Pas debatit të madh në rrjete sociale , MLS kur është munduar të arsyetojë këtë çmim të lartë, kanë thënë se është i tillë meqë analizat merren brenda 45 minutave.

Por, menjëherë është demantuar nga një qytetar, i cili e ka faktuar se pavarësisht që kishte paguar 200 euro, i është dashur të presë më shumë se dy orë për analiza.

Derisa çmimi për kryerjen e një testi PCR jo rapid, sipas MLS-së, kushton 65 euro.

---