Shteti i Viktorias në Australi shpall gjendjen e katastrofës nga Covid-19

(AP Photo/Channi Anand)

Shteti i Viktorias në Australi shpalli të dielën gjendjen e katastrofës dhe vendosi një shtetrrethim në kryeqytetin Melburn, duke ndërmarrë kështu lëvizjen më të ashpër për të parandaluar përhapjen e COVID-19.

Ky vendim erdhi pasi që Melburn, qyteti i dytë më i madh i Australisë (edhe pse ndodhet prej kohësh në një urdhër izolimi 6-javor), në dy javët e kaluara ka shënuar një numër rekord infektimesh.

Shtetrrethimi nga ora 8 e mbrëmjes deri në 5 të mëngjesit do të nisë të zbatohet nga kjo e diel, duke u ndaluar rreth 5 milionë banorëve të dalin nga shtëpitë, përveç rasteve kur duhet të shkojnë në punë apo duhet të marrin ndihmë mjekësore.

“Sonte po shpall gjendjen e katastrofës në Viktorja. Kjo do të jetë një masë shtesë ndaj gjendjes së jashtëzakonshme që ka zgjatur deri më sot. Kjo do të thotë se policia dhe autoritetet e tjera kanë kompetenca shtesë. Ne jemi të sigurt se masat e reja do të zbatohen dhe askush të mos ketë dyshime për këtë”, deklaroi Daniel Andrews, kryeministër i shtetit të Viktorias, përcjell albinfo.ch.

Ndërkohë, të gjitha shkollat do të kalojnë në mësim online, duke filluar nga e mërkura, më 5 gusht.

Ditën e diel Viktoria raportoi 671 infeksione, një ndër më të lartët dhe 7 vdekje nga COVID-19.

Masat e reja, sipas autoriteteve zyrtare, do të qëndrojnë në fuqi për të paktën 6 javë.