Zvicër: Maska falas për përfituesit e ndihmave sociale

Konferenca Zvicerane për Mirëqenie Sociale (Skos) u ka rekomandonuar qyteteve dhe komunave që t'ua sigurojnë ato falas përfituesve të ndihmave sociale

Maskat mbrojtëse, bartja e të cilave në transportin publik është bërë e detyrueshme që nga fillimi i javës, kanë çmimin e tyre që nuk mund të nënvlerësohet. Prandaj, Konferenca Zvicerane për Mirëqenie Sociale (Skos) u ka rekomandonuar qyteteve dhe komunave që t’ua sigurojnë ato falas përfituesve të ndihmave sociale, shkruan srf.ch.

Është e vërtetë se shumë persona që varen nga ndihmat sociale nuk udhëtojnë për në punë çdo ditë, por edhe ata kanë nevojë për transportin publik. Kjo ndodh për shembull kur marrin pjesë në masat e integrimit ose nëse fëmijët e tyre udhëtojnë në shkollë me transport publik dhe janë më të vjetër se dymbëdhjetë vjet, transmeton albinfo.ch.

Sipas Presidentit të Shoqatës së Kryetarëve të Komunave të Kantonit të  Cyrihut, Jörg Kündig, tashmë ka komuna në këtë kanton ku personat që jetojnë nga ndihmat sociale mund të marrin maska ​​mbrojtëse pa pagesë, përcjell albinfo.ch. Ndërsa komunat e tjera u paguajnë personave të prekur kontributin për maska, krahas shumës normale të ndihmës sociale.

Në qytetin e Cyrihut, përfituesit e ndihmave sociale marrin retroaktivisht shumën për blerjen e maskave, pasi ta tregojnë faturën për maskat e blera.

---