Ekonomia zvicerane do të pësojë rënien më të rëndë që nga viti 1975

Ekonomia e Zvicrës pritet të përjetojë rënien e saj më të madhe në dekada këtë vit për shkak të pandemisë koronavirus, sipas qeverisë zvicerane.

Produkti i brendshëm bruto do të bjerë 6.2% në vitin 2020, tha Sekretariati Shtetëror për Çështjet Ekonomike (SECO) të martën, e kjo sipas tij është rënia më e rëndë që nga viti 1975, përcjell albinfo.ch.

Ekonomistët parashikojnë që papunësia të rritet në 3.8% këtë vit, pasi tregtia e jashtme po vuan, shpenzimet e konsumit zvogëlohen dhe kompanitë dalin ngadalë nga mbyllja. Qeveria pret një rikuperim gradual gjatë gjysmës së dytë të vitit 2020 dhe deri në vitin 2021. Por, kjo do të varet nga faktorë të shumtë, duke filluar nga mundësia e një vale të dytë të koronavirusit, e ndjekur nga kufizime të rënda, dhe duke supozuar se pushimet nga puna dhe falimentimet e korporatave mbeten të kufizuara dhe se kërkesa nga jashtë kthehet ngadalë në nivele normale, tha SECO.

Ekonomisti qeveritar, Ronald Indergand, i tha Reuters se ekonomia e Zvicrës mund të humbasë më shumë se 100 miliardë dollarë në prodhim për shkak të pasojave nga pandemia e koronavirusit.

“Mbi bazën për kokë banori, rënia do të jetë po aq e keqe sa mesi i viteve 1970, nëse jo edhe më keq”, tha Indergand, përcjell tutje albinfo.ch.

---