Shërohet pacientja e parë me koronavirus në Maqedoninë e Veriut

Pacientja, e cila u regjistrua me coronavirus, sot do të lëshohet nga spitali,

Informacionet e fundit tregojnë se pacientja e parë, e cila u regjistrua me coronavirus, sot do të lëshohet nga spitali, pasi është shëruar dhe testet përfundimtare i kanë dalë negative, përcjell albinfo.ch.

Ndërsa raste të reja të të infektuarve nuk ka. Nga Ministria e Shëndetësisë informojnë se pacientja nga Dibra, e cila është në makineri respiratore ka përmirësim të lehtë, por prognoza akoma është e paparashikuar. Kurse të gjithë pacientët e tjerë kanë gjendje stabile.

Po ashtu, është bërë e ditur se masat dhe rekomandimet për menaxhimin e coronavirusit janë duke u zbatuar. I gjithë personeli shëndetësor në të gjitha institucionet e shëndetit publik dhe spitalet private është mobilizuar dhe është vënë në dispozicion.

Ndërkohë, spitalet private kanë vënë në dispozicion objektet e tyre, përfshirë gati 70 shtretër të kujdesit intensiv, me makina të frymëmarrjes. Ministri i Shëndetësisë, Venko Filipce, informoi se ka 120 respiratorë në vend, nga të cilët 90 në Shkup.

Situata e krizës dhe masat e rekomanduara në Dibër dhe Qendër Zhupë, prej ku shumica e pacientëve janë të infektuar, deri tani zbatohen me sukses.

---