Tiçino i fut në karantinë të gjithë personat me simptoma të gripit

Repartet e urgjencës të spitaleve në Tiçino tashmë kanë reaguar. Njerëzit që kanë  simptoma të gripit po izolohen dhe futen në karantinë

Pasi që në Italinë veriore po vazhdon përhapja e koronavirusit, shqetësimi po rritet edhe në Kantonin izviceran të Tiçinos, që kufizohet me zonën e përmendur. Mjeku kantonal i Tiçinos, Giorgio Merlani ka deklaruar të dielën për agjencinë e lajmeve Keystone-SDA se situata dhe zhvillimi rreth virusit është duke u analizuar. “E tëra është më e madhe nga sa dukej në fillim” ka thënë ai.

Ndërkohë, repartet e urgjencës të spitaleve në Tiçino tashmë kanë reaguar, transmeton albinfo.ch. Sipas gazetës së të dielës “Il caffè della domenica”, njerëzit që kanë  simptoma të gripit po izolohen dhe futen në karantinë.

Deri më tani, izolimi bëhej vetëm për pacientët që kishin qenë kohët e fundit në Kinë.

Shpërthimi i koronavirusit në Italinë e Veriut e prek në mënyrë të drejtpërdrejtë kantonin jugor të Zvicrës. “Tiçino është vërtetë pjesë e shtetit të Zvicrës, por si regjion gjeografik, është pjesë e Italisë së veriut, shkruan sda.ch. Për këtë arsye, shqetësimi në këtë zonë lidhur me koronavirusin është plotësisht i kuptueshëm.

Megjithatë, Giorgio Merlani i konsideron të tepërta thirrjet e disa politikanëve të Tiçinos për të mbyllur kufijtë. “Ende nuk mund të flasim për një epidemi”, ka thënë ai për 20 minuten.

Sipas mendimit të tij, nuk do të kishte kuptim mbyllja e kufijve. Një e treta e fuqisë punëtore në Ticino përbëhet nga punëtorë ndërkufitarë që vijnë çdo ditë nga Italia, përcjell albinfo.ch. “Nëse do të mbylleshin kufijtë, do të kishte mungesë të stafit në spitale”.

Merlani beson në masat që zbatohen në zonat italiane të prekura nga virusi. Masa të ngjashme lokale do të merren gjithashtu në Tiçino nëse është e nevojshme. “Në këtë rast, do të aktivizohej stafi vendor bazë”. Si rezultat, do të vendoset, veç tjerash, nëse do të anulohet karnavali.

Nesër, e hënë, autoritetet e kantonit do të vendosin se cilat masa do të merren për mbrojtje nga koronavirusi.

---