Doli nga shtypi numri më i ri i magazinës albinfo.ch

Nga sot, lexuesit e albinfo.ch do të kenë në duar numrin më të ri, të parin për këtë vit, të magazinës me të njëjtin emër. Në këtë numër ka një larushi temash e materialesh, të cilat, si zakonisht, i lidh fokusimi i përhershëm në temat rreth mërgatës, kryesisht asaj të Zvicrës.

Ndryshe nga numrat tjerë, numri i parë i vitit 2020 nuk ka vetëm një tërësi temash ose dosje që do të rrihte  një temë të vetme. Në këtë numër, redaksia e albinfo.ch është fokusuar në disa tërësi më të vogla tematike.

“Mosha e tretë” ose pleqëria në mërgim, me të gjitha dukuritë që e shoqërojnë dhe me mundësitë për të kaluar me sa më pak brenga këtë etapë jetësore, është njëri nga problemet që janë vënë në spikamë nga ky numër i albinfo.ch. Në këtë kontekst ju prezantojmë disa tema që trajtojnë mundësitë e strehimit të të moshuarve tanë, në Zvicër por edhe në Kosovë.

Magazina jonë i ka kushtuar dy tema edhe përvjetorit të shpalljes së pavarësisë së Kosovës, datë kjo e cila është përputhur me kohën e daljes së botimit tonë. Autor i njërës prej tyre është shefi i Misionit Konsullor të Kosovës në Cyrih, z. Sami Kastrati.

Një temë tjetër speciale e këtij numri është intervista me Vllaznim Xhihën. Bëhet fjalë për filantropin e madh, inxhinierin e parë shqiptar që ka mbaruar studimet në universitetin prestigjioz ETH të Cyrihut. Por, ajo që e bën z. Xhiha veçanërisht interesant është kthimi i tij në Kosovë, pas mbi 25 vitesh të kaluara në Zvicër si afarist i suksesshëm. Ky kthim ka rezultuar shumë i frytshëm, pasi që profesor Xhiha ka shkrirë përvojën dhe ekspertizën e tij zvicerane për të “mbjellë”  tek më të rinjtë në Kosovë dashurinë për punën, për krijimin dhe për inovacionin.

Në këtë numër, albinfo.ch ju ofron edhe tema tjera nga përditshmëria e diasporës si dhe prezantime  nga fusha e librit, sportit, modës etj.