Në ‘Samitin e Grave të Biznesit’ u zhvilluan tri panele tematike

Gjatë ditës së parë të punimeve të “Samitit të Grave të Biznesit” u zhvilluan tre panele tematike

Paneli i parë e kishte në fokus diskutimin mbi temën e Lidershipit të Gruas në Biznes. Në panelin II u trajtua tematika mbi Sfidat e Gruas Sipërmarrëse të Diasporës, ndërsa pjesë e Panelit III ishte diskutimi mbi Përfshirjen e Gruas në Sipërmarrjen Inovative, transmeton albinfo.ch.

Pjesëmarrëset vlerësuan organizimin e këtij samiti, si një nismë e veçantë për krijimin e një rrjetëzimi me njëra-tjetrën. Ato ndanë me të pranishmit përvojën e tyre të suksesshme profesionale dhe ofruan shembullin e gruas së suksesshme në administratë, sipërmarrje dhe biznes.

Gjithashtu, me rëndësi ishte dhe promovimi i rolit të gruas shqiptare jashtë vendit, rëndësia e përfshirjes të sa më shumë grave në drejtimin dhe manaxhimin e sipërmarrjeve dhe bizneseve si dhe nxitja e investimeve në Shqipëri.

Për herë të parë gra të Diasporës shqiptare dhe vendase, të suksesshme në fushën e sipërmarrjes dhe biznesit, janë bërë bashkë në një kuvend të gjerë, organizuar nga Fondi Shqiptar për Zhvillimin e Diasporës në bashkëpunim me Ministrinë e Financave dhe Ekonomisë, nën kujdesin e veçantë të Ministrit të Shtetit për Diasporën.

Pjesëmarrëse në këtë takim ishte edhe znj. Anila Denaj, ministër i Financave dhe Ekonomisë, e cila në fjalën e saj solli një pasqyrë të përgjithshme të përfshirjes së gruas shqiptare në fushën e biznesit dhe politikat që qeveria shqiptare po zbaton në rritjen e përfaqësimit të gruas në ekonomi. Ajo u ndal dhe në një moment tjetër shumë të rëndësishëm, siç është nënshkrimi i kontratës së kredisë që do të mundësojë kalimin e hendekut të barazisë gjinore në vendin tonë. /Albinfo.ch.

 

 

---