Ndihma të shumta drejt Shqipërisë, ndihmon edhe Spitali Universitar i Bazelit

Në ndihmë atyre u ka ardhur edhe Spitali Universitar i Bazelit. Ky institucion ka sjellë qindra pako me pampersa, qindra të tjera me artikuj të higjienës

Një grup vullnetarësh në Bazel, që vijnë nga të gjitha trojet shqiptare, kanë grumbulluar një sasi të madhe ndihmash me destinim zonat e goditura nga tërmeti në Shqipëri.

Siç e thotë për albinfo.ch njëri nga këta vullnetarë  (N.B.) që nuk duan t`u përmenden emrat, me ndihmat e dhuruara janë mbushur dy kamionë me nga 40 tonelata. Bëhet fjalë për veshmbathje, batanie dhe gjësende të tjera, të dhuruara nga qytetarët.

Por në ndihmë atyre u ka ardhur edhe Spitali Univesritar i Bazelit (Universitätsspital Basel). Ky institucion ka sjellë qindra pako me pampersa, qindra të tjera me artikuj të higjienës, pastaj tenda dhe artikuj medicinalë, bën të ditur N.B.

Njëri nga kamionët është nisur sot në orën 12, ndërsa tjetri pritet të niset të hënën pasdite.

---