Shqiptari sulmon me thikë personin e panjohur, viktima në rrezik jete

Pas ikjes nga vendi i krimit, vetëm rreth 500 metra më larg, në filialin e marketit tjetër (Manor) sulmuesi i njëjtë kishte kërcënuar me thikë klientët

Të mërkurën, rreth orës 18 të mbrëmjes në Biel/Bienne (Kantioni i Bernës) një shqiptar i moshës 53-vjeçare ka plagosur rëndë me thikë një person tjetër. Ngjarja e rëndë ka ndodhur në hyrjen e një marketi të Migros-it, shkruan 20minuten.ch.

Sipas një dëshmitari, dorasi e kishte sulmuar viktimën nga mbrapa, duke e goditur disa herë me thikë në pjesën e qafës, përcjell albinfo.ch. Viktima ndodhet në rrezik për jetën. Atë e kanë transportuar në spital me një helikopter dhe tani mjekët po luftojnë për t`i shpëtuar jetën.

Pas ikjes nga vendi i krimit, vetëm rreth 500 metra më larg, në filialin e marketit tjetër (Manor) sulmuesi i njëjtë kishte kërcënuar me thikë klientët. Vetëm ndërhyrja e fuqishme e një roje nga personeli i sigurimit ka parandaluar më të keqen. Roja e ka mbërthyer atë dhe e ka neutralizuar, duke e mbajtur derisa ka ardhur policia.

Disa video që po qarkullojnë në Instagram dhe Snapchat tregojnë sjelljen e dorasit gjatë arrestimit.

Shqiptari 53-vjeçar tashmë ndodhet në arrest dhe është marrë në pyetje, transmeton albinfo.ch. Po ashtu janë marrë në pyetje edhe një numër dëshmitarësh. Sipas gjendjes së tashme të hetimeve, sulmnuesi dhe viktima nuk janë njohur mes vete dhe duket se bëhet fjalë për viktimë të rastit. Ndërkaq, hetimet më të detajuara pritet të hedhin më shumë dritë në prapavijën e sulmit.

---