Serbia vazhdon të armatoset nga Rusia

Serbia mbetet aleat i Rusisë, ndonëse synon anëtarësimin në Bashkimin Evropian

Rusia pritet t’i dorëzojë Serbisë një sistem të sofistikuar raketash kundërajrore, ndonëse Shtetet e Bashkuara kanë paralajmëruar sanksione të mundshme kundër vendit ballkanik në rast se blen raketa të tilla.

Agjencia ruse e lajmeve TASS shkroi të mërkurën se sistemi raketor Pancir do të dërgohet në Serbi ‘gjatë muajve të ardhshëm në pajtim me kontratën e nënshkruar”.

I dërguari i posaçëm amerikan për Ballkanin Perëndimor, Matthew Palmer, ka paralajmëruar Serbinë se blerja e armatimeve të tilla “mund të rrezikojë” vendosjen e sanksioneve nga Shtetet e Bashkuara.

Serbia mbetet aleat i Rusisë, ndonëse synon anëtarësimin në Bashkimin Evropian. Beogradi është zotuar se do të qëndrojë jashtë NATO-s dhe ka refuzuar t’u bashkohet sanksioneve perëndimore ndaj Rusisë për shkak të konfliktit në Ukrainë, raporton “Zëri i Amerikës”.

Rusia ka ndihmuar Serbinë të përmirësojë ushtrinë e saj me avionë, helikopterë dhe tanke, duke ngritur shqetësime në rajonin e Ballkanit të dërmuar nga luftërat, përcjell albinfo.ch.

Gjatë shkatërrimit të përgjakshëm të ish-Jugosllavisë në vitet e 90-ta, Serbia ishte në luftë me fqinjët e saj; Kroacinë, Bosnjën dhe Kosovën.

Forcat ushtarake serbe janë të mbështetura pothuajse 80 për qind në teknologji sovjetike, një trashëgimi nga Armata Popullore Jugosllave dhe planifikojnë të blejnë pajisje nga të dyja palët, Rusia dhe Bashkimi Evropian, për të përmirësuar forcat e saj ajrore të varfëruara nga luftërat ballkanike të viteve 1990.

Presidenti serb, Aleksandër Vuçiç, tha këtë javë në një intervistë televizive se Serbia po blen armë mbrojtëse nga Rusia dhe se dëshiron të shmangë çfarëdo sanksionesh amerikane apo “përplasje me Amerikën”.

“Serbia po armatoset sepse është një vend i lirë, i rrethuar nga vendet anëtare të NATO-s, me të cilat ne duam të jemi miq”, tha ai, duke shtuar se nuk do të lejojë që Serbia “të jetë aq e dobët sa ishte në vitet e 90-ta”.

NATO-ja bombardoi forcat serbe në vitin 1999 për t’u dhënë fund mizorive të tyre ndaj shqiptarëve të Kosovës.

Kosova shpalli pavarësinë e saj në vitin 2008, e cila kundërshtohet nga Beogradi dhe Moska.

Muajin e kaluar Rusia dërgoi në Serbi sistemet raketore Pancir dhe S-400 që u përdorën në stërvitjet ushtarake serbo-ruse.

Autoritetet serbe thanë se të premten në Beograd do të qëndrojë Thomas Zarzecki nga Departamenti amerikan i Shtetit, i cili është i ngarkuar me zbatimin e sanksioneve ndaj Rusisë dhe vendet që shkelin ato sanksione.

Mediet serbe cituan ministrin e Jashtëm Ivica Daçiç të ketë thënë se Serbia nuk i ka shkelur sanksionet amerikane për blerjen e armëve nga Rusia dhe “nuk ka arsye për vendosje sanksionesh ndaj saj”.

---