Në Lucern prijnë kosovarët për pajisje me pasaportën zvicerane

Më së shumti të natyralizuar rezultojnë kosovarët: 303 prej tyre gjatë vitit 2018 kanë marrë pasaportë zvicerane

Zyra Kantonale e Lucernit për Statistikë (Lustat) në një njoftim të publikuar të mërkurën ka bërë të ditur se gjatë vitit të kaluar në këtë kanton kanë ardhur për të jetuar 5045 persona nga jashtë. 15.4% prej tyre kanë pasaportë zvicerane, 14.2% janë shtetas gjermanë dhe 6.3% italianë, shkruan Luzerner Zeitung.

Nga komunitetet e huaja që më shumë kanë ardhur për të jetuar në Zvicër se sa që e kanë lëshuar Zvicrën, në vendin e parë janë italianët, transmeton albinfo.ch. Kanë qenë pra 123 shtetas italianë më shumë të ardhur se të shpërngulur. Pas tyre, po kështu me saldo pozitive  vijnë shtetasit kosovarë (107) dhe ata gjermanë (102).

Në vitin 2018 në kantonin e Lucernit jetonin 75 885 të huaj me qëndrim të përhershëm dhe 2897 sish me qëndrim të përkohshëm. Nga viti 1991 numri i të huajve në kanton pothuajse është dyfishuar, ndërsa përqindja e tyre në popullatën e gjithmbarshme është rritur nga 11.9% në 18.5%, transmeton albinfo.ch. Ndërsa në nivel të Zvicrës gjatë kësaj periudhe përqindja e të huajve është shtuar nga 17.4% në 25.1%.

Në vitin e kaluar afërsisht çdo i pesti i huaj ose 18.5% ishte gjermanë. Në vendin e dytë ishin shtetasit e Kosovës, të Italisë dhe të Portugalisë: të tri këto komunitete përbënin nga 10% të të huajve në kanton.

Në përgjithësi Lustat ka regjistruar praninë e 158 nacionaliteteve në kanton.

85 % e banorëve të Kantonit të Lucernit flasin schweizerdeutsch (dialekti zviceran i gjermanishtes) dhe gjermanisht. Pas gjermanishtes, me nga 4%, vijnë gjuha shqipe, italiane dhe ajo serbe/kroate.

Gjatë vitit 2018 në Kantonin e Lucernit janë natyralizuar (kanë marrë pasaportën zvicerane) gjithsej 1697 të huaj, që i bie 22.5 natyralizime në 1000 të huaj me qëndrim të përhershëm. Më së shumti të natyralizuar rezultojnë kosovarët: 303 prej tyre gjatë vitit 2018 kanë marrë pasaportë zvicerane. Pas tyre vijnë gjermanët (271), serbët (119) etj.

---