“Tri Net Film Fest”, një përpjekje artistike që ia ka vlejtur

Ky event ka bërë që sadopak të ngjallet jeta kulturore e komunitetit shqiptar në qytetin Wil, ku është mbajtur por dhe më gjerë

Mbrëmë, e shtunë, përfundoi aktiviteti artistik “Tri net film fest”, i organizuar nga Studio “Aktrimi” dhe i mbështetur nga Ministria kosovare e Diasporës dhe Investimeve strategjike.

Ky event ka bërë që sadopak të ngjallet jeta kulturore e komunitetit shqiptar në qytetin Wil, ku është mbajtur por dhe më gjerë.

I lutur nga albinfo.ch që të flasë lidhur me rrjedhën e “Festit”, Ramadan Morina nga Studio Aktrimi, në cilësinë e bashkorganizatorit shprehet i kënaqur me atë që u ofrua gjatë këtyre tri netëve. “Mund të nxjerrim si konkluzion se kjo iniciativë ishte e duhur dhe u mirëprit nga publiku. Kjo mund të thuhet sidomos për natën e fundit, kur interesimi dhe prania e adhuruesve të filmit ishte shumë e kënaqshme”, thotë Morina.

Ndërsa rreth nivelit artistik të filmave të shfaqur ai vlerësimin e tij e mbështet në reagimin e publikut. “Për sa i takon aspektit artistik nuk do të donim që të veçonim ndonjërin nga filmat meqë aktiviteti nuk kishte karakter garues. Por në debatet pas shfaqjes së filmave në të tri netët u përgëzuam për përzgjedhjen e tyre sepse tematika që trajtuan dhe mesazhet që këta filma jepnin, u mirëpritën nga publiku”, shprehet R. Morina.

Ecuria e këtyre tri netëve u trajtua në mënyrë më të veçantë  në debatin e natës së tretë meqë edhe prania e publikut ishte e madhe dhe cilësore.

“Kishte edhe mendime që shfaqja e 4 filmave për një natë krijonte ndoshta vështirësi që publiku t`i ruante në memorje ngjarjet e filmave ndaras. Për këtë arsye u propozua që në rast të përsëritjes së Film Fest ndoshta do të ishte më mirë që në një mbrëmje të mos ketë më shumë se 3 filma”, thotë Morina.

Përpos përfaqësuesve të shoqatave e shoqërive të ndryshme, në natën e tretë prezantoi edhe Shefi i Misionit Konsullor të Kosovës në Cyrih, zoti Sami Kastrati, i cili iu drejtua publikut me një fjalë rasti.

Mbrëmjen e parë e ka moderuar Fikrim Morina, të dytën, Xheneta Avdyli ndërsa mbrüemjen e tretë, Yllka Zuzaku dhe Ramadan Morina. Në zhvillimin e debateve pas filmave janë inkuadruar edhe kolegët tjerë nga  Studio Aktrimi, si: Fikrimi, Avdiu e Veliu.

Në një fjalë përshëndetjeje që njëherësh ishte dhe një analizë profesionale rreth natës së tretë, aktori Ridvan Murati apeloi për nevojën që ngjarje të tilla të mbështeten. Ai po ashtu vlerësoi pozitvisht filmat e natës së fundit.

Organizatorët u janë mirënjohës të gjithëve që ishin të pranishëm në këtë event. Por gjithsesi ata falënderojnë Ministrinë e Diasporës për mbështetjen e aktivitetit, pastaj  zonjën Shukrie Ramadani nga Konsullata e Kosovës në Cyrih, shoqatat e ndryshme, platformën mediale albinfo.ch etj.

Në të tri netët kishte koktej rasti, që është shtruar nga ana e Ministrisë së Diasporës dhe Investimeve Strategjike.

Organizatorët falënderojnë edhe pronarin e restorantit Lindenhof në Wil, z. Drilon Pula dhe stafin, që ishin shumë të angazhuar për mbarëvajtjen e aktivitetit.

---