Humbja e madhe e Ahmetit, dëshpërim te qytetarët e Prishtinës

Banorët e kryeqytetit, të cilët Shpend Ahmeti i udhëheq tash e gjashtë vjet, duket se e kanë humbur besimin në kryetarin e tyre.

Këtë e dëshmon numri i vogël i votave që PSD-ja e Ahmetit i ka marrë në Prishtinë në zgjedhjet e parakohshme parlamentare të 6 tetorit, raporton KTV, përcjell albinfo.ch.

PSD-ja, që në këto zgjedhje garoi në koalicion me AAK-në, ka dalë subjekti i katërt, duke marrë vetëm 7 mijë e 633 vota, apo 7.6 për qind.

Mandatin e dytë të kryetarit të Prishtinës, Ahmeti, atëherë pjesë e Vetëvendosjes, e kishte fituar me votat e 42 mijë qytetarëve.

Këtë rënie në vota të Ahmetit, qytetarët e lidhin me punën e pamjaftueshme në komunë dhe me angazhimin e tij si kryetar i një partie tjetër.

Për analistët politikë, ky rezultat i dobët i Ahmetit në Prishtinë është shfaqje e pakënaqësive të qytetarëve me mënyrën se si po udhëhiqet komuna më e madhe në vend.

Monitoruesit e punës së Komunës thonë se kryetari Ahmeti i ka larguar qytetarët nga vetja, duke mos marrë pjesë në shumë takime publike me ta.

Sipas Iniciativës për Progres, ky rezultat e ka lëkundur pozitën e Ahmetit si kryetar.

Përveç në këto zgjedhje, Ahmeti kishte kandiduar për deputet edhe si anëtar i LVV-së në 2017-ën, ku kishte dalë më i votuari pas Albin Kurtit, por që më pas e kishte zgjedhur pozitën e kryetarit të Prishtinës.

https://youtu.be/n3by4Cpf56I

 

---