Austriakët, të kënaqur me klimën e biznesit në Maqedoni

Shuma e përgjithshme e investimeve të drejtpërdrejta austriake në Maqedoni është 437 milionë euro deri në çerekun e dytë të vitit 2014

Bizneset austriake janë më optimiste për klimën e biznesit për punë në Maqedoni. Kushtet për tërheqjen e investitorëve të huaj si të mira i kanë vlerësuar 26 për qind, ndërsa 51 për qind si të kënaqshme.

Kështu tregojnë rezultatet e hulumtimit të dytë, të cilin e zbatoi sektori tregtar në kuadër të Ambasadës së SHBA-së në Republikën e Maqedonisë për klimën e biznesit mes kompanive austriake, të cilat punojnë në vend.

Gjendjen ekonomike momentale në Maqedoni, pjesa më e madhe, apo 39 për qind, e kanë vlerësuar si të kënaqshme, ndërsa 23 për qind si të mirë. 

Për vitin 2014 më shumë se gjysma, gjegjësisht 55 për qind janë prononcuar se gjendja do të jetë e ngjashme, ndërsa 40 për qind më e mirë, ku gjithashtu ka progres, pasi që vitin e kaluar janë pronоncuar vetëm 13 për qind, transmetojnë mediet në Shkup.

Vitin e ardhshëm 54 për qind presin që sektori i tyre të zhvillohet. Momentalisht gjendjen në kompaninë e tyre 50 për qind e kanë vlerësuar si të kënaqshme, ndërsa 32 për qind si të mirë.

Në hulumtim 62 për qind janë prononcuar se do të kenë rritje në kompani në vitin 2015, numri i të punësuarve për 47 për qind do të mbetet i pandryshuar, ndërsa te 42 për qind do të kenë rritje të të punësuarve dhe 45 për qind janë prononcuar se do të kenë rritje të investimeve.

Austria është investitori i tretë në Maqedoni. Sipas Bankës Popullore të Maqedonisë, shuma e përgjithshme e investimeve të drejtpërdrejta austriake në vend është 437 milionë euro deri në çerekun e dytë të vitit 2014. Në Maqedoni punojnë 45 deri në 50 kompani nga Austria dhe kanë të punësuar rreth 5.000 dhe 6.000 persona në vend.