ABSM zhvilloi ceremoninë e përfundimit të vitit shkollor 2013-2014

Numri i pjesëmarrësve në kurset e ofruara nga ABSM-i si në ato të gjuhës gjermane ashtu edhe të informatikës, ishte 511 vetë

ABSM, qendër trajnimi dhe këshillimi për migrantët, është një adresë e njohur prej më shumë se 15 vitesh në Bazel dhe në gjithë Zvicrën për aktivitetet e saj të shumta që zhvillon.

Siç bëhet e ditur në një komunikatë shtypi nga kjo qendër, më 26 qershor  ABSM në Bazel ka organizuar ceremoninë tradicionale të përfundimit të vitit shkollor 2013- 2014 dhe të dorëzimit të dokumenteve të pjesëmarrësve në kurset e saj. Numri i përgjithshëm i pjesëmarrësve në kurset e ofruara nga ABSM-i si në ato të gjuhës gjermane ashtu edhe të informatikës ishte 511 vetë.

Ashtu si edhe vitin e kaluar, festimi u zhvillua në ambientet e restorantit L’Esprit. Ishin të ftuar e të pranishëm edhe përfaqësues nga  Departamenti i Arsimit të qytetit të Bazelit, si dhe nga Departamentet e Komunave të ndryshme te Basel- Land-it, thuhet më tej në komunikatë. Prezantimi dhe shpërndarja e certifikatave u bë nëpërmjet  një programi të larmishëm muzikor mjaft emocionues.
Pas  një fjalimi të shkurtër dhe me mesazhe për integrim, harmoni dhe bashkëpunim të Presidentit të ABSM-së, Skender Nikoliqi, ceremonia  vazhdoi me një shfaqje muzikore nga artistë amatorë nga Bazeli dhe Brazili. Më pas, të ftuarit u argëtuan në një koktej me specialitete nga vende të ndryshme të botës.

ABSM, Qendra e Trajnimit dhe Këshillimit  për emigrantët në Bazel, ka më shumë se 15 vjet që organizon kurse të gjuhës gjermane, informatikës, të aftësimit profesional e  të integrimit. Përveç kurseve specifike të gjuhës gjermane për femra, nëna me përkujdesje paralele të fëmijëve ASPECTA dhe  TAKIMI, i cili u mundësohet vetëm grave shqipfolëse, është edhe kursi KONKRET, për të rinj dhe të reja. Qëllimi kryesor i këtyre kurseve është  mbështetja e grave, nënave, fëmijëve, adoleshentëve dhe të rinjve, për përvetësimin  e  gjuhës gjermane si dhe që të zhvillojnë aftësitë e tyre sociale dhe ndërkulturore.

Për pjesëmarrësit e kurseve të rregullta të gjuhës gjermane dhe të integrimit, ABSM ofron edhe kurse shtesë të komunikimit- Konversationskurse.

Që nga prilli 2014 ABSM plotësohet edhe me një kurs GFK –Gewaltfreie Komunikation,  për harmoni dhe tolerancë në komunikim e për më shumë besim dhe siguri në jetën private dhe profesionale.

ABSM ofroi në vitin shkollor 2013/2014  kurse në nivelet gjuhësore A1 deri B2. 130 pjesëmarrësit e kursit  kaluan me sukses dhe rezultate shumë të mira provimet e semestrit të fundit shkollor dhe erdhën  faqebardhë në ceremoninë e përfundimit të vitit shkollor për të marrë solemnisht dokumentet përfundimtare.

Besim Pajaziti, nënkryetar i ABSM-së, i informoi të pranishmit me rezultatet më të mira të testit  për çdo pjesëmarrës.
Ceremonia u zhvillua në një atmosferë festive, me çaste plot humor e gëzim, të nxitura edhe nga kujtimet  më të bukura dhe nga historitë gazmore, që u treguan nga disa prej pjesëmarrësve në kurse, thuhet në komunikatën e dërguar nga Zyra e Shtypit e ABSM në Bazel