Miratohet raporti për shkarkimin e presidentit Meta

Me 13 vota pro e një kundër, Komisioni i ligjeve, i drejtuar nga Ulsi Manja, miratoi raportin me propozim për Kuvendin e Shqipërisë për ngritjen e një komisioni hetimor parlamentar ndaj Presidentin Ilir Meta për të hetuar shkeljen e Kushtetutës nga ana e tij, me dekretin që anulon datën e zgjedhjeve të 30 qershorit.

Raporti u prezantua në Komisionin e ligjeve nga relatori i çështjes, Adnor Shameti, i cili tha se kërkuesit për shkarkimin e Presidentit vlerësojnë se kreu i shtetit ka shkelur Kushtetutën me nxjerrjen e dekretit për anulimin e zgjedhjeve.

“Përgjigjja e institucionit të Presidentit tregoi qartazi se nuk kishte interes të dëgjohej në komision. Përgjigjja kishte një gjuhë fyese dhe ironike”, tha Shameti, duke theksuar më tej se KQZ-ja nuk e mori në konsideratë dekretin e Presidentit dhe vijoi punën, transmeton albinfo.ch.

Kundër këtij vendimi ishte vetëm kreu i Ballit Kombëtar, Adriatik Alimadhi. Raporti do t’i dërgohet Kuvendit në seancën e 4 korrikut.