Zvicër: A do të shtyhet mosha e pensionimit në 66 vjet?

Me një iniciativë popullore synohet të arrihet që si burrat ashtu dhe gratë, të pensionohen në moshën 66 vjeçare

Të rinjtë e Partisë Liberale të Zvicrës (FDP) kanë bërë të ditur se do të iniciojnë një iniciativë popullore për zgjatjen e moshës për pensionim. Ata synojnë që me iniciativën e tyre të arrihet që si burrat ashtu dhe gratë, të pensionohen në moshën 66 vjeçare, shkruan srf.ch.

Në muajin gusht të këtij viti, para zgjedhjeve nacionale që mbahen në tetor, juniorët e FDP-së do të fillojnë grumbullimin e nënshkrimeve të nevojshme për këtë iniciativë, transmeton albinfo.ch. Ata janë marrë vesh për detajet e tekstit të iniciativës, në kongresin e mbajtur të dielën.

Ky tekst parasheh që mosha e pensionimit të fillojë të ngritet me hapa dymujorë, ashtu që nga fillimi i vitit të katërt pas votimit të kësaj iniciative nga populli, të hyjë në fuqi mosha 66 vjeçare për pensionim. Edhe mosha e pensionimit të grave do të përshtatet me atë të burrave, por te ato, ngritja në 66 vjet pritet të realizohet 6 vite pas votimit të iniciativës.

Në Zvicër, prej kohësh zhvillohet debat rreth nevojës për shtyrjen e moshës së pensionimit, shkruan albinfo.ch Kërkesat në këtë drejtim mbështeten në rritjen e moshës mesatare të zviceranëve dhe me uljen e numrit të të rinjve, gjegjësisht paguesve të kontributeve nga të cilat krijohet fondi i pensioneve.

---