OPOZITA NË TIRANË, SOT SËRISH NË PROTESTË

Opozita në Shqipëri sonte do t’u kthehet protestave në Tiranë. Kreu i demokratëve, Lulzim Basha, ka paralajmëruar një tubim paqësor mbrëmjen e sotme.
Ai ka thënë se regjimi i Ramës ka mbaruar dhe se sonte nuk do të ketë asnjë episod dhune. Basha apeloi shqiptarët të dalin në protestē me familje, ndërsa shtoi se do të jetë aty së bashku me gruan dhe dy vajzat e tij.
“Nuk do të ketë absolutisht asgjë që të kërcënojë një fije floku të një qytetari apo të një punonjësi të ndershëm të rendit. Kemi marrë të gjitha masat për të neutralizuar çdo provokator të qeverisë”, ka thënë ai, transmeton albinfo.ch.
Pas reagimit të Ambasadës Amerikane, e cila bëri thirrje që qytetarët shqiptarë të distancohen në protestë nga çdo akt dhune, kryetarja e LSI-së, Monika Kryemadhi, ka thënë se ia kanë bërë të qartë Ambasadës së SHBA-së se opozita bën vetëm protesta paqësore.