Shpallet i pafajshëm mjeku që ka ndihmuar vdekjen e pacientit

Sipas ligjit, medikamentet vdekjeprurëse mund të përshkruhen vetëm kur gjendja e pacientit është e njohur nga mjeku, gjë që në këtë rast nuk ka ndodhur

Gjykata e Qarkut e Neuchatelit, si gjykatë e shkallës së dytë e ka shpallur të pafajshëm një mjek për ndihmën që ka ofruar në “vdekjen e asistuar” të një personi 89 vjeçar. Ai i ka përshkruar plakut në fjalë një substancë vdekjeprurëse, pa e konstatuar më parë personalisht gjendjen e tij shëndetësore.

Pacienti në fjalë i ishte drejtuar organizatës për vdekje të asistuar (eutanazi) “Exit” pasi që konsideronte se sëmundja dhe gjendja e tij jetësore ishin të papërballueshme kështu që donte t`i jepte fund jetës. Ai madje kishte bërë edhe përpjekje për vetëvrasje, shkruan nzz.ch. Pastaj, mjeku i ka përshkruar atij 15 gramë të substancës vdekjeprurëse edhe pse pacienti e kundërshtonte kontrollimin mjekësor.

Shkalla e parë e gjyqësisë e kishte dënuar mjekun me një gjobë prej 500 frangash. Ajo kishte konstatuar se mjeku kishte vepruar në kundërshtim me ligjin. Sipas ligjit, medikamentet mund të përshkruhen vetëm kur gjendja shëndetësore e pacientit është e njohur nga mjeku, gjë që në këtë rast nuk kishte ndodhur.

Duke qenë se bëhet fjalë për një rast unik, ky ka ngjallur interesim edhe në kantonet tjera pasi që mund të shërbejë si precedent për rate të ngjashme.