Kenan Murseli shpallet „Mister Zvicra Frankofone“

"Kam fituar shumë prej kësaj aventure dhe me ka ndihmuar që të kem më shumë vetëbesim për gara të tjera“, tregon për „albinfo.ch“, 24 vjeçari nga Ferizaj

Djaloshi kosovar, Kenan Murseli ka triumfuar në konkursin e bukurisë në Zvicër ku mori titullin „Mister Suisse Francophone 2019“. Finalja e spektaklit u mbajt të shtunën, më 1 qershor në Gjenevë.

Në konkurrencën e femrave, me çmimin e parë si „Miss“ u shpërblye Angela Odier nga Gjeneva.
Në këtë finale morën pjesë 5 kandidatë shqiptarë, tre djem dhe dy vajza.

I kontaktuar pas triumfit të finales, Kenan Murseli për albinfo.ch shprehet tejet i lumtur për këtë sukses.
„Jam ende duke e festuar këtë titull me familje dhe shoqëri“, thotë Kenani dy ditë pas fitores.

„Fitorja nuk ishte e lehtë. Finalja ka qenë një natë me shumë emocione. Kam fituar shumë prej kësaj aventure dhe me ka ndihmuar që të kem më shumë vetëbesim për gara të tjera“, tregon për „albinfo.ch“, 24 vjeçari nga Ferizaj që jeton në Payerne të Zvicrës.

Në planet e ardhshme të Kenanit janë konkurset ndërkombëtare.

„Pas kësaj fitore më janë hapur rrugët për të marrë pjesë edhe në gara ndërkombëtare të bukurisë“, thotë ai.

Kenani studion për menaxhment në Friburg, ndërkohë pëlqen shumë udhëtimet. Një nga qytetet më të bukura sipas tij, është Nju Jorku.

---