Mali Pashtrik dhe liqeni i Vermicës pritet të shpallen zona të mbrojtura

Endrit Shala (Facebook)

Gjatë një vizite zyrtare në Kosovë, ministri i Turizmit dhe Mjedisit, Blendi Klosi, zhvilloi një takim me ministrin e Mjedisit dhe Planifikimit Hapësinor, Fatmir Matoshi, me të cilin diskutuan për problematikat në fushën e mjedisit mes 2 vendeve dhe intensifikimin e bashkëpunimit për zgjidhjen e shqetësimeve të përbashkëta.

Në përfundim të takimit, ministri Klosi dhe homologu i tij dolën me disa konkluzione konkrete, siç është shpallja zonë e mbrojtur e malit të Pashtrikut dhe liqenit të Vërmicës, formalizimi i parkut natyror të përbashkët, me qëllim shndërrimin e vijës ndërkufitare Shqipëri-Kosovë në atraksion të shtuar turistik, raporton ATSH, përcjell albinfo.ch.

Një vendim, për të cilin po punojnë autoritetet përkatëse shtetërore të Shqipërisë dhe Kosovës, pritet të zyrtarizohet më 28 nëntor. Pjesë e rëndësishme e diskutimit mes 2 ministrave ishte edhe menaxhimi i përbashkët i mbetjeve, i cili do të shoqërohet me operacione pastrimi dhe plane menaxhimi të përbashkëta.

Pas takimit me ministrin Matoshi, takimin e radhës ministri Klosi e zhvilloi me ministrin e Turizmit, Tregtisë dhe Industrisë së Kosovës, Endrit Shala dhe përfaqësues të njohur të operatorëve turistikë shqiptarë, ku diskutuan për zhvillimin e ofertave turistike të 2 vendeve, për ofertën e përbashkët Shqipëri-Kosovë, pjesëmarrjen e përbashkët në panaire si edhe promovimin e turizmit malor, një aset i rëndësishëm, sidomos i turizmit në Republikën e Kosovës.