Zviceranët jashtë vendit, sa banorët e kantonit Vaud

Nga gjithsej 732 mijë sish, më së shumti zviceranë ka në vendet evropiane gjithsej 452965. Shumica dërmuese e tyre 98.71% janë në vendet e BE-së

Zviceranët me qëndrim jashtë vendit, ose “zviceranet e jashtëm” (Auslandschweizer) siç quhen ndryshe, kanë mbërritur numrin prej 732.183 personash, duke u bërë kështu të barabartë me banorët e kantonit Vaud. Siç dihet, kantoni i përmendur është i treti për nga numri i banorëve në Zvicër, pas atij të Cyrihut dhe të Bernës.

Numri i përmendur më lartë përfshin të gjithë ata persona që kanë shtetësi zvicerane, janë të regjistruar në ndonjërën nga përfaqësitë e Zvicrës në botë. “Zvicra e pestë” siç quhet ndryshe diaspora e Zvicrës figurin me këto shifra në një statistikë vjetore të publikuar të enjten nga  Departamenti i punëve të jashtme i Zvicrës.

Sipas statistikës në fjalë, numri i “zviceranëve të jashtëm” brenda vitit 2013 është rritur për 2.3 për qind, që është mbi mesataren e pesë viteve të fundit. Më së shumti zviceranë ka në vendet evropiane gjithsej 452965. Shumica dërmuese e tyre 98.71% janë në vendet e BE-së. Ndërsa 77% e këtij numri jetojnë në katër shtetet fqinje  me Zvicrën: Në Francë 191362, në Gjermani 82626, në Itali 50716 dhe në Austri 15208.

Komuniteti më i madh zviceran jashtë Evropës jeton në SHBA dhe përbëhet nga 777520 persona ose 1.58 më shumë se në vitin 2012. Me radhë vjen komuniteti i Zvicrës me qëndrim në Kanada(39253) në Australi 24007 dhe në Izrael 16913. Në këtë të fundit ka pasur rritje mbimesatare gjatë vitit që shkoi, gjegjësisht +5.9%.

Ndonëse me numrin e gjithëmbarshëm Zvicra e pestë ka madhësinë e kantonit të tretë në Zvicër, forca e saj votuese krahasohet me atë të një kantoni mesatar, si Tesina, Thurgau ose Valisi, thuhet në komunikatën e Departamentit të jashtëm. 155523 prej tyre ose 27.26% janë të regjistruar në regjistrin e votimeve.