Familja mesatare në Zvicër “çon dëm” 60 kg. ushqime në vit

Foto ilustrim

Rreth 2.6 milionë tonë – apo 190 kilogramë për person, është masa e mbeturinave ushqimore që krijohet në Zvicër çdo vit, ka njoftuar Zyra Federale e Mjedisit.

Nga një sërë raportesh që analizojnë rolin e sektorëve të ndryshëm në prodhimin dhe trajtimin e mbeturinave ushqimore, Zyra Federale për Mjedisin (Bafu) njoftoi të hënën se 1.7 milion tonë e mbeturinave ushqimore që mund të shmangen (pra, janë të ngrënshme), prodhohen çdo vit në Zvicër.

E ‘fajtorët’ kryesorë për këtë dalin të jenë familjet dhe konsumatorët, që përbëjnë 38 për qind të atyre që prodhojnë këto mbeturina, shkruan swissinfo, përcjell në shqip albinfo.ch.

Vetëm gjysma e një milion tonë mbeturinave të hedhura nga familjet zvicerane përfundojnë të djegura me mbetjet e tjera të përgjithshme, pjesa tjetër riciklohet apo ripërdoret si ushqim për kafshë.

Disa faktorë që thuhet se kanë ndikuar në rritjen e këtij problemi, janë mungesa e vetëdijesimit nga ana e konsumatorëve dhe nevoja për sisteme ndarëse (të mbeturinave) më adekuate dhe infrastrukturë ricikluese nëpër komuna.

Familjet zvicerane prodhojnë mesatarisht rreth një milion tonelata mbeturina në vit, nga ushqimet. Rreth gjysma e kësaj mase mbeturishash, ose 60 kilogramë për person, mund të shmangej.

Edhe industritë ushqimore në Zvicër prodhojnë pothuajse të njejtën sasi të mbeturinave ushqimore sa familjet. Vetëm se, një e katërta e mbeturinave ushqimore që krijohen nga këto industri, janë të pashmangshme, përcjell albinfo.ch.

Një pjesë e madhe e mbeturinave ushqimore vjen nga sektori bujqësor. Ai hedh në trajtë mbeturinash për çdo vit nga 225.000 tonelata artikuj ushqimorë, shkruan srf.ch ndërsa 90 për qind e kësaj sasie mund të mos hidhej, bën të ditur Ministria e Ambientit (Bafu) në raportin e publikuar sot.

Raporti pasqyron rezultatet e kërkimeve të bëra viteve të fundit rreth asaj se sa ushqime përmes “Food Waste” çohen dëm, transmeton albinfo.ch. Këshilli Federal i Zvicrës, në muajin mars ishte ngarkuar nga parlamenti që të hartonte një plan aksioni kundër çuarjes dëm të artikujve ushqimorë.

Statistika të publikuara për gastronominë tregojnë se 200.000 tonelata mbeturina ose 69% nga gjithsej 290.000 sa prodhohen në gastronomi, ka mundësi të kursehen. Kjo nënkupton se, llogaritur në një racion ushqimor të shërbyer në restorante, 124 gramë shkojnë dëm.

Bafu i sheh analizat si bazë të mirë për përpunimin e objektivave të reduktimit të mbetjeve ushqimore për “Food Waste”. Agjenda 2030 e OKB-së për zhvillim të qëndrueshëm parasheh një reduktim të mbeturinave ushqimore.

Zvicra, në kuadrin e kësaj agjende është zotuar që deri në vitin 2030 t`i përgjysmojë mbeturinat ushqimore për kokë banori. Po ashtu duhet të reduktohen edhe humbjet që bëhen gjatë procesit të prodhimit dhe shpërndarjes, furnizimit.