ISIS-i kishte planifikuar sulm mbi rafineritë e naftës në Bazel

Fjala është për një sulm mbi tubacionin e një rafinerie të naftës në Bazel, në afërsi të kufirit me Francën

Luftëtarët e Shtetit Islamik (IS) duket se kishin bërë plane për të bërë një sulm në Zvicër. Në një disk kompjuteri të gjetur në Siri, të braktisur nga terroristët, gazeta “Sunday Times” ka zbuluar plane të detajuara të sulmit si dhe strategji të organizatës terroriste.

Një komandant i IS-it kishte shpallur realizimin e dy sulmeve, njërin në Gjermani e tjetrin në Zvicër. Fjala është, sipas raportimeve të bëra nga Blick dhe gazetat e shtëpisë Tamedia, për një sulm mbi tubacionin e një rafinerie të naftës në Bazel, në afërsi të kufirit me Francën, transmeton albinfo.ch. Këtë cak terroristët e kishin zgjedhur për shkak të “katastrofës ekonomike” të cilën dëshironin ta shkaktonin në të dy vendet.

Një fotografi satelitore e bërë mbi njërën nga rafineritë u ishte bashkëngjitur dokumenteve. Siç ka konstatuar një gazetar i Blick-ut nga vendi i apostrofuar, këto fotografi sqaruese nuk ishin të aktualizuara pasi që tankerët që shihen aty, janë çmontuar ndërkohë këtë vit.

Por, sa real ka qenë rreziku i një sulmi?

Shërbimi Informativ Federal i Zvicrës (NDB) bën të ditur se ka qenë i njohur me raportimet në fjalë, përcjell albinfo.ch. “NDB aktualisht nuk ka informacione shtesë lidhur me sulme të mundshme dhe me përmbajtjen tjetër të këtyre dokumenteve”, deklarojnë në Shërbimin Informativ.

NDB paraqitet me tone të zbutura. Sipas tij, aktualisht “nuk ka indicie mbi plane konkrete të sulmeve kundër caqeve në regjionin e Bazelit.

---