Papunësia në Zvicër, më e madhe se në disa vende të Europës

Zvicra është e njohur për nivelin e ulët të papunësisë. Megjithatë, ka vende të tjera në Europë që kanë papunësi edhe më të vogël, shkruan lenews, përcjell albinfo.ch.

Ka disa mënyra për ta matur papunësinë. Për shembull, të papunë llogariten ata që janë të regjistruar zyrtarisht si të tillë, por është edhe Organizata Ndërkombëtare e Punës (ILO) që përfshin të gjithë ata që kërkojnë punë.

Të dhënat zyrtare në vitin 2018 tregonin se shkalla e papunësisë në Zvicër ishte 2.6 për qind. Megjithatë, norma e ILO-s për Zvicrën ishte 4.9 për qind, përcjell albinfo.ch.

Ndërkaq, norma e përgjithshme për Europën veriore, që përfshin Britaninë e Madhe, Suedinë, Norvegjinë, Irlandën, Finlandën, Danimarkën dhe Islandën, ishte 4.7 për qind, pak më poshtë se norma për Zvicrën.

Po ashtu, edhe disa vende të tjera konsiderohen se kanë shkallë të papunësisë më të vogël se Zvicra. Sipas ILO-s, ato janë Gjermania (3.4%), Austria (4.8%), Polonia (3.7%), Holanda (3.9%), Norvegjia (3.9%), Britania e Madhe (4.0%) dhe Republika Çeke (2.4%).