Ambasadori i BE-së: Zvicra rrezikon vetizolimin

Luftë me fjalë në mes të ambasadorit të BE-së në Bernë dhe bashkëkryesuesit të iniciativës "Kundër migracionit masiv"

Shumica e spektrit politik të Zvicrës është shprehur tashme kundër “Inicativës kundër migrimit masiv” që udhëhiqet nga SVP/UDC. Argumenti kryesor i kundërshtarëve është ai se iniciativa rrezikin raportet e Zvicrës me Bashkimin Evropian.

Së fundi edhe ambasadori i Bashkimit Evropian në Zvicër, Richard Jones ka mbështetur argumentet e kundërshtarëve të iniciativës në fjalë. Ai, në një intervistë të dhënë televizionit srf1, ka qenë i qartë: Në rast se populli i thotë po iniciativës, atëherë negociatat për kontingjentet e migrantëve nga BE (siç i parasheh iniciativa) duhet të harrohen. Me fjalë të tjera, Jones thotë se, nga këndvështrimi i BE-së Zvicra në një rast të tillë duhet të tërhiqet nga marrëveshja për lëvizje të lirë me BE-në.

Në këtë mënyrë Zvicra do të futej në një izolim në raport ne shtetet e BE-së që e rrethojnë.

Por, bashkëkryesuesi i iniciativës, deputeti nacional i SVP-së, Adrian Amstutz  thotë se Zvicra nuk duhet të frikësohet nga izolimi. Sipas tij, duke qenë Zvicra partner i rëndësishëm ekonomik i BE-së, ajo do të mund të rinegociojë marrëveshjen për lëvizje të lirë me të. Veç kësaj Amstutz thotë se BE-ja nuk do të jetë e interesuar të heqë dorë nga marrëveshja për qarkullimin rrugor me Zvicrën.

“BE-ja është e varur nga traseja Veri-Jug që kalon nëpër Zvicër. Ajo kurrë nuk do të dëmtojë veten duke hequr dorë nga kjo marrëveshje”.  

Amstutz po ashtu ka akuzuar ambasadorin e BE-së, Jones se po përzihet në fushatat referendare të Zvicrës. Sipas tij edhe vendet anëtare të BE-së do të ankoheshin sikur të kishin një shkallë kaq të lartë të migracionit sikundër e ka Zvicra. Por te ato, përqindja e të huajve është dukshëm më e ulët.

Të gjitha këto do të bëjnë që Brukseli të tregojë mirëkuptim për iniciativën e SVP-së, ka thënë bashkëkryesuesi i iniciativës “Kundër Migracionit Masiv”.