Kosovë: Ministri i Arsimit tërhiqet nga vendimi për zëvendësimin e orëve të humbura

Ministri i Arsimit, Shkencës dhe Teknologjisë në Kosovë, Shyqyri Bytyqi, ka thënë se janë tërhequr nga vendimi për kompensim të tri javëve mësim, që u humbën pas grevës.

Pas mbledhjes së Komisionit për Arsim, kryetari Ismajl Kurteshi është zotuar se do të punojnë në Ligjin për pagat sa i përket ciklit klasor të mësimdhënësve, që të iniciohet ndryshimi i Ligjit dhe rritja edhe për koeficientin e mësuesve për klasat 1 deri 5.

Kjo është edhe kërkesa e SBASHK-ut, që të bëhet ky ndryshim, e pas kësaj ata do të shqyrtojnë mundësinë e zëvendësimit të orëve.

“Do të bëj tërheqjen e vendimit për orët e humbura. Nëse ndryshohet edhe koeficienti i pagave për mësimdhënësit 1-5 deri 6.9, atëherë do të thërrasim Këshillin dhe do të marrim vendim për kompensimin e orëve të humbura”, tha ministri.

SBASHK-u ka treguar se aktualisht ata janë pajtuar vetëm për zëvendësimin e 1 jave të orëve të humbura.

Ndërkaq, më 14 janar të këtij viti, Sindikata e Bashkuar e Arsimit, Shkencës dhe Kulturës nisi grevën e përgjithshme në arsim si shenjë pakënaqësie ndaj koeficientit të pagave për punëtorët e arsimit.

Greva rezultoi me tri javë humbje mësimi për fëmijët, e kërkesa e SBASHK-ut, që ishte rritja e koeficientit të pagave për 30 për qind, nuk u plotësua, përcjell albinfo.ch.