Kryeministri Rama akuzon opozitën se po e vonon hapjen e negociatave

Dy partitë kryesore të opozitës në Shqipëri, PD-ja dhe LSI-ja, sipas kryeministrit Edi Rama, po dëmtojnë hapjen e negociatave, e po ashtu edhe rritjen e ekonomisë dhe  turizmin. Nga Kuvendi, Rama u zotua se nuk do të ketë negociata për mandatin e pozitës që po kërkon opozita me protesta. 

Ai tha se nëse do të ketë një vendim, nuk do të jetë për shkak të opozitës, përcjell albinfo.ch.

“Karrigia e tyre është me afat, nuk është pa afat. Ata mund të kenë ende shpresë se këtu do të vijnë nga qielli negociator edhe do të na ulin në tavolinë dhe do të na thonë: hë tani djema, si do ta normalizoni këtë punë?! Ka vetëm një normalizim të mundshëm, të nevojshëm, të domosdoshëm, mbyllja e kapitullit 30-vjet unë po iki po s’më thirre. Unë nuk rri po s’më dhe atë që dua, unë po bëj këtë po s’më bëre atë. Ky kapitull do të mbyllet tani, është koha për ta mbyllur. Çdo parti politike kur vjen në Kuvend duhet ta mendojë mirë.  Vjen në opozitë është në opozitë, nuk ka xinxri-finxri, jo jam në opozitë por e dua pushtetin të nesërmen e betimit se dua zgjedhje të parakohshme”, ka thënë Rama.