Viti 2018, rekord për pajisjen me pasaporta zvicerane në Cyrih

Gjatë vitit 2018, në qytetin e Cyrihut janë natyralizuar 3982 persona me shtetësi të huaj. Ky numër është rekord për tetë vitet e fundit

Për çdo fillim viti, autoritetet e qytetit të Cyrihut ftojnë qytetarët të cilët rishtas kanë marrë paspaortën zvicerane në një solemnitet të organizuar për ta. Solemniteti i sivjetëm u mbajt më 28 mars në sallën e madhe të Shtëpisë së Kulturës, Volkshaus të qytetit dhe në të morën pjesë rreth 1000 persona të posanatyralizuar. Përveç programit kulturor, në këtë aktivitet pati edhe fjalime nga autoritetet e qytetit, shkruan albinfo.ch duke iu referuar një komunikate. U konstatua veç tjerash se natyralizimi i të huajve përbën pasurim për qytetin.

Me këtë rast  u kumtua edhe numri i shtetasve të huaj të cilët gjatë  vitit 2018 kanë fituar nënshtetësinë zvicerane.

3981 veta në qytetin e Cyrihut ose më së shumti në tetë vitet e fundit, janë pajisur gjatë vitit 2018 me pasaportën e Zvicrës. Mbi 1200 prej tyre  ose afërsisht çdo i treti, janë nga Gjermania. Pas gjermanëve në radhë vijnë, në një distancë të madhe, italianët (310), portugezët (143) etj.

Kur bëhet fjalë për rekord, duhet kujtuar se vetëm në vitin 2010 ka pasur më shumë të natyralizuar. Atëbotë kanë qenë 4570 sish, transmeton albinfo.ch. Ndërsa rekordin absolut e mban viti 2006 kur pasaportën zvicerane në qytetin e Cyrihut e kishin marrë 5154 shtetas të huaj.

Gjermanët janë që nga viti 2011 në krye të listës për natyralizim në Cyrih dhe një gjendje e përafërt konstatohet edhe në gjithë Zvicrën gjermane Ndërsa ajo që bie në sy për gjithë këtë periudhë është rënia e numrit të të natyralizuarve nga Ballkani. Shtetasit e Kosovës, Serbisë e të Malit të Zi u prinin listave për natyralizim nga viti 2001 deri në vitin 2010, transmeton albinfo.ch. Ndërsa kur jemi te statistika për vitin 2018, kosovarët janë në vendin e shtatë, me më pak se 100 të natyralizuar. Shtetasit e Serbisë janë në vendin e pestë ndërsa ata të Maqedonisë, në të dhjetin.

---