Përshëndet shokët e mësuesen dhe emigron në Gjermani

Tre vitet e fundit në ciklin fillor numri i nxënësve është ulur për 138 nxënës, ndërsa në atë të mesëm për 559 nxënës

Kjo orë mësimi në shkollën fillore “Bajram Shabani” në Kumanovë ishte e fundit për nxënësin e klasës së parë Milot Emini.

Ai shfrytëzoi këtë orë për të mësuar edhe shkronjat e mbetura të alfabetit të gjuhës shqipe për shkak se të nesërmen po nisej drejt Gjermanisë për të filluar një jetë të re bashkë me familjen e tij, raporton “Alsat”.

I mërzitur që po ndahej nga shkolla, mësuesja dhe shokët e klasës, Miloti tha se ata gjithmonë do të mbeten në kujtimet e tij më të bukura, përcjell albinfo.ch.

Në Kumanovë dhe jo vetëm dita ditës ulet në mënyrë të ndjeshme numri i nxënësve në shkolla. Familje të shumta për shkak të mungesës së perspektivës dhe gjendjes së rëndë ekonomike mbledhin valixhet dhe nisen në ndonjë vend evropian. Vetëm në shkollën “Bajrami Shabani” për pesë vite 81 nxënës më pak janë ulur në bankat shkollore.

Gjendja e njehtë edhe në Gostivar. Tre vitet e fundit në ciklin fillor numri i nxënësve është ulur për 138 nxënës, ndërsa në atë të mesëm për 559 nxënës.

 

---