14 të vdekur, 7 në gjendje të rëndë

Mëngjesin e sotëm ministri i Shëndetësisë së Maqedonisë, Venko Filipce dhe kryeministri maqedonas Zoran Zaev kanë vizituar spitalin e qytetit “8 shtatori” në Shkup.

Pas vizitës Ministri i Shëndetësisë para gazetarëve konfirmoi se viktimat janë 14 dhe jo 15 siç flitej mëngjesin e sotëm, ndërsa 7 të tjerë ndodhen në gjendje të rëndë.

Për momentin nga 7 pacientët në gjendje të rëndë 4 janë të shtruar në spitalin “9 shtatori” ndërsa 3 të tjerët në Klinikën Universitare “Nënë Tereza”, raporton “Alsat”.

Për momentin 37 të shtruar në gjendje më të mirë shëndetësore gjenden në spitalin “8 shtatori”, ndërsa 8 në Klinikën e Shkupit “Nënë Tereza”, kurse 2 në spitalin e Tetovës dhe 1 në atë të Gostivarit, përcjell albinfo.ch.

Ai shtoi se nga 4 të lënduarit në gjendje të rëndë 3 janë operuar dhe për momentin janë nën observimin e plotë të ekipit të mjekëve.

Ministri Filipçe siguroi nga ana tjetër se ekipet e mjekëve po bëjnë të pamundurën dhe se 80 për qind e mjekëve ndodhen në shërbim dhe në disponibilitet të plotë për përballimin e kësaj situate emergjente.

Dy ditë zie në Maqedoni për aksidentin tragjik

Qeveria e Maqedonisë ka marrë vendim mbrëmë që sot dhe nesër ti shpall ditë zie në këtë shtet për t’i nderuar 14 viktimat që humbën jetën në aksidentin tragjik që ndodhi mbrëmë në autostradën Shkup-Gostivar, në afërsi të fshatit Llaskarcë.

Ndërsa Komuna e Gostivarit njofton se do të shpall tri ditë zie për këtë ngjarje.